झापा / राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले आगामी सरकारको नेतृत्व रास्वपाले गर्ने दावि गरेका छन् ।
रास्वपाका सभापति रवि लामिछाने र काठमाडौं महानगरपालिकाका मेयर बालेन्द्र शाहबीच हिजाे भएकाे ५ घण्टाकाे भेटवार्ता भएपछि सामाजिक संजाल एक्समा लेख्दै वाग्लेले यस्तो लेखेका छन् ।
उनले एक्समा आफ्नो भिडियो पनि पोष्ट गर्दै देशको राजनीतिले अव कोल्टे फेरेको टिप्पणी समेत गरेका छन् । उनले अव रास्वपाले देशको राजनीतिलाई नयाँ दिशातिर लाने र त्यसको मूल भूमिका राष्ट्रिय स्वतन्त्र पार्टीले खेल्ने पनि बताए ।
उनले रवि र बालेनको फोटो पोष्ट गर्दै अगाडिको उज्यालो बाटो भनेर टिप्पणी समेत गरेका छन् । उनले भदौ २३ गतेको नरसंहारका लागि जिम्मेवार एमाले-कांग्रेस सरकार र तिनै दुई दलको बर्चस्व रहेको पछिल्लो संसदको वैधता पूर्णत सकिएकोले त्यसको पुनर्स्थापना हुँदैन भनेर पनि लेखेका छन् ।
वाग्लेले फागुन २१ को आम निर्वाचनबाट चुनिने ताजा जनादेश प्राप्त संसद्ले अर्को पाँच वर्षका लागि स्थिर संघीय सरकार बनाउने र नेतृत्व राष्ट्रिय स्वतन्त्र पार्टीले गर्ने बताएका हुन् ।
