झापा । कानुन, न्याय तथा संसदीय मामिला मन्त्री पदम गिरीले पत्रकारहरूको न्यूनतम पारिश्रमिक बढाउने कुरामा आफू लागिपर्ने बताएका छन् ।
शनिबार काठमाडौँमा आयोजित एक कार्यक्रममा बोल्दै मन्त्री गिरीले मिडिया काउन्सिललगायतका मिडियासँग सम्बन्धित कानुनहरू जति सक्दाे चाडाे पारित गराउन पनि आफूले विशेष ध्यान दिने आश्वासन दिए ।
श्रमजीवी पत्रकार ऐन कार्यान्वयनमा पनि आफूले सक्दो पहल गर्ने भन्दै नेपाली मिडियाले संघीय लोकतान्त्रिक गणतन्त्र स्थापनामा राजनीतिक दलहरूसँगै महत्त्वपूर्ण योगदान पुर्याएको उल्लेख गरे ।
गिरीले भने, ‘श्रमजीवी पत्रकार ऐन बन्यो तर कार्यान्वयन भएको छैन, यसमा के कमी छन् र यसलाई कार्यान्वयन गर्नका लागि के गर्नुपर्ने हो ? यस विषयमा मैले आफ्नो ठाउँबाट सकेसम्म लागि पर्छु । अब मिडिया काउन्सिल विधेयकको कुरा छ । यसको अलावा मिडियासँग सम्बन्धित ५/६ वटा विधेयकहरू पनि छन् । ती विधेयकहरूको अवस्था हेरेर त्यसलाई छिटो समितिहरूमा लैजाने, समितिहरूबाट छिटो टुङ्ग्याउने कुरामा जाेड दिन्छु' ।
