साङ्केतिक तस्वीर
झापा । पश्चिमी वायुसँगै आएको पश्चिमी न्यून चापीय प्रणाली कमजोर देखिएकाले पूर्वी नेपालमा यसपालिको हिउँदे वर्षा नहुने आँकलन गरिएको छ ।
बुधबार साँझसम्मको अवस्था हेर्दा बादल पूर्वतिर सर्ने क्रममा रहे पनि यसको असर गण्डकी प्रदेशसम्म मात्र पर्ने देखिएको मौसमविद् मीनकुमार अर्यालले जानकारी दिए ।
उनका अनुसार मध्य र पूर्वी नेपालमा बदलीसँगै केही ठाउँमा हल्का वर्षा र हिमाली क्षेत्रमा हल्का हिमपात हुन सक्छ । तर, पश्चिम पहाडी क्षेत्रमा जस्तो असर देखिने अवस्था छैन ।
काठमाडौँ उपत्यकामा बदली रहे पनि ठुलो वर्षाको सम्भावना छैन । आज बिहीबार हल्का वर्षासम्म हुन सक्छ । तराईमा भने बदली भए पनि वर्षाको सम्भावना नरहेको महाशाखाले जनाएको छ ।
त्रिभुवन विश्वविद्यालयको जल तथा मौसम विज्ञान विभागका सहप्राध्यापक विनोद पोखरेल पनि यो वर्ष हिउँदे वर्षाको पूर्वानुमान गर्न पनि गाह्रो भएको बताउँछन् ।
प्रशान्त महासागरमा विकसित भएको प्रणाली लालिनाका कारण यो वर्ष हिउँदे वर्षा प्रभावित भएको हो ।
