बिर्तामोड क्षेत्रमा केही दिनदेखि चोरीका घटना बढेपछि प्रहरीले सतर्क रहन आग्रह गरेको छ ।
एक साताभित्र बिर्तामोडमा तीन ठाउँ चोरी भएको हो । बिर्तामोड २ स्थित सांगवेद संस्कृत मावि र दुईवटा निजी घरमा चोरी भएको प्रहरीले जनाएको छ । विशेष गरी कोही नभएको मौका छोपी खाली घरहरुबाट चोरहरुले नगद र गरगहना चोरी गरेको इलाका प्रहरी कार्यालय बिर्तामोडका डीएसपी सन्तोष पाठकले बताए । उनले बिजयादशमी तथा शुभ दिपावली, छठ पर्व नजिकिदै गरेको अवस्थामा आपराधिक मनासय भएका व्यक्तिहरुद्वारा चोरी लगायत अन्य आपराधिक घटनाहरु वढ्न सक्ने भएको हुँदा सतर्कता अपनाउन आग्रह गरेका छन् ।
चाड पर्वको पूर्व सन्ध्यामा चोरी लगायतका घटना बढेपछि इलाका प्रहरी कार्यालय बिर्तामोडले सार्वजनिक रुपमा अपिल गरेको छ । साबधानी नै सुरक्षाको कडी हो भन्दै सम्भव भएसम्म घरमा ताला लगाई सम्पूर्ण सदस्यहरु एकै पटक बाहिर नजान ,बिशेष काम परेर घरका सम्पूर्ण सदस्य बाहिर जानु परेमा विश्वासिलो व्यक्तिलाई जिम्मा लगाई छरछिमेकमा समेत जानकारी गराएर बलियो ताला लगाएर मात्र जान,घरको मुख्य भागहरुमा सम्भव भएसम्म सी.सी. टि.भी. जडान गर्न ,सुनचाँदी तथा नगद लगायतका बहुमूल्य सामग्रीहरु सुरक्षित स्थानमा राख्न , सामाजिक संजालमा घर नफर्की बाहिर घुमघाम गरिरहेको फोटो तथा भिडियोहरु पोस्ट नगर्न , घरमा मर्मत तथा बिभिन्न कार्य गर्न आउने व्यक्तिहरुको गतिबिधि निगरानी गर्न र घर वरपर तथा टोल छिमेकमा नयाँ तथा शंकास्पद व्यक्तिहरुको गतिबिधिहरु निगरानी गर्न र शंका लागेमा प्रहरीलाई खबर गर्न अनुरोध गरेको हो ।
