। बाँकेको कोहलपुरमा सेफ्टी टयाङ्की सफा गर्ने क्रममा फसेर आज तीन जनाको मृत्यु भएको छ ।जिल्ला प्रहरी कार्यालय, बाँकेका प्रहरी नायब उपरीक्षक प्रतितसिंह राठौरले टयाङ्की सफा गर्ने क्रममा निस्सासिएर उनीहरुको मृत्यु भएको हुन सक्ने आशङ्का गरेका छन् । मृत्यु हुनेहरुमा कोहलपुर नगरपालिका वडा नं ३ निवासी ४१ बर्षका कालु थारु, सोही ठेगानाका २६ बर्षका प्रकाश थारु र बर्ष ३४ का बिर्जा थारु रहेका छन् । कोहलपुर नगरपालिका–३ शान्तिटोलस्थित दयाप्रसाद थारुको निर्माणाधीन घरको आँगनमा बनाइँदै गरेको सेफ्टी टयाङ्कीमा उनीहरु फसेका थिए ।
प्रहरी नायब उपरीक्षक राठौरका अनुसार सेफ्टी टयाङ्कीमा मानिस फसेको सूचना प्राप्त हुनासाथ इलाका प्रहरी कार्यालय कोहलपुरका प्रहरी नायब उपरीक्षक चक्र डम्मर पालको नेतृत्वमा १५ सदस्यीय प्रहरी टोली घटनास्थल पुगेको थियो ।
प्रहरीले जेसीबीको सहायताले सेफ्टी टयाङ्की फुटाएर बिहान करिब १० बजे तीनै जनाको शव बाहिर निकालेको थियो । मृतकहरूको शव पोस्टमार्टमका लागि भेरी अस्पताल, नेपालगन्ज पठाइएको छ ।
