झापा / बलिउड अभिनेता सलमान खानलाई आतङ्ककारी बताएको एउटा पत्र सामाजिक सञ्जालमा भाइरल भइरहेको छ । यो पत्र पाकिस्तान सरकारले जारी गरेको दाबी गरिएको छ ।
डीडी न्युजका अनुसार, सलमानले गत हप्ता साउदी अरबमा एक कार्यक्रमका क्रममा बलुचिस्तानलाई पाकिस्तानबाट अलग बताएपछि उनीमाथि कथित रूपमा यो कारबाही गरिएको हो । पत्रमा पाकिस्तान सरकारले सलमानलाई ‘आतङ्कवाद विरोधी ऐन १९९७’ को चौथो सूचीमा राखेको उल्लेख छ । यो सूचीमा आतङ्कवादसँग सम्बन्धित भएको शङ्का गरिएका व्यक्तिहरूलाई राखिन्छ ।
यद्यपि, केही मिडिया रिपोर्टहरूमा यो खबर फेक भएको बताइएको छ । सलमानले बलुचिस्तानसँग जोडिएको बयान अक्टोबर १७ मा दिएका थिए, जबकि पत्रमा अक्टोबर १६ को मिति उल्लेख छ । यसबाहेक, सोही नम्बरको अर्को पत्र पनि पाकिस्तान सरकारले जारी गरेको थियो । यी सबैका आधारमा यो पत्र नक्कली भएको दाबी गरिएको छ ।
