झापा । झापाको भद्रपुरमा बर्षेनी गरिँदै आएको दुर्गा पूजाको तयारी बारे आज छलफल गरिएको छ । भद्रपुर–६, मुख्य बजारस्थित दुर्गा मन्दिरमा दसैँमा गरिने सार्वजनिक पूजाको तयारीका सन्दर्भमा भद्रपुर नगरपालिकाको सभा हलमा सरोकारवालाबीच छलफल गरिएको हो ।
सार्वजनिक दुर्गा पूजा समितिका कार्यवाहक अध्यक्ष अजय साहेवालाको अध्यक्षता एवम् भद्रपुर नगरपालिकाका प्रमुख गणेश पोखरेलको प्रमुख आतिथ्यमा आयोजित छलफलमा झापाका प्रमुख जिल्ला अधिकारी बन्ध्रुप्रसाद वाँस्तोलालगायत जिल्लास्थित तीन वटै सुरक्षा निकायका प्रमुखहरू, सरकारी निकायका प्रमुखहरू, भद्रपुर नगरपालिकाका जनप्रतिनिधिहरू, धार्मिक तथा सामाजिक संघ–संस्थाका प्रतिनिधि एवम् सञ्चारकर्मीहरूको उपस्थिति थियो ।
समितिका सचिव राजेन्द्र चापागाईँले सञ्चालन गरेको कार्यक्रममा परम्परागत रुपमा दशकौँदेखि भद्रपुरस्थित दुर्गा मन्दिरमा गरिँदै आएको पूजालाई यस वर्ष अझ भव्य, परिष्कृत कसरी बनाउन सकिन्छ भन्ने बारेमा छलफल भएको थियो । घटस्थापनादेखि विजयादशमीसम्म तिथि अनुसार गरिने पूजा विधिका बारेमा जानकारी गराइएको छलफलमा प्रजिअ बास्तोलाले पूजा अवधिभर सुरक्षाका लागि सुरक्षा निकायका सबै अङ्गलाई खटाइने जानकारी दिए ।
नगरप्रमुख पोखरेलले भद्रपुरमा गरिने दुर्गा पूजा हरेक वर्ष विशेष रहँदै आएको उल्लेख गर्दै यस वर्ष पूजालाई अझ भव्य बनाउने गरी जुट्न सबैसँगआग्रह गरेका थिए ।
