झापा / तिलोत्तमा नगरपालिकाले आगामी आर्थिक वर्षको लागि दुई अर्ब ९२ करोड ९३ लाख ७१ हजार ५८२ रुपैयाँको बजेट प्रस्तुत गरेको छ। नगर उपप्रमुख र बजेट तथा कार्यक्रम तर्जुमा समिति संयोजक जागेश्वरी चौधरीले सोमबार तेस्रो नगरसभाको सातौं अधिवेशनमा यो बजेट सार्वजनिक गरिन्।
आर्थिक वर्ष २०८२/०८३ का लागि चालु खर्चमा एक अर्ब २९ करोड ४० लाख ७२ हजार अर्थात् ४४.१७ प्रतिशत र पूँजीगत खर्चमा एक अर्ब ६३ करोड ५२ लाख ९९ हजार ५८२ रुपैयाँ अर्थात् ५५.८३ प्रतिशत विनियोजन गरिएको छ।
उपप्रमुख चौधरीले बजेटको स्रोततर्फ आन्तरिक राजस्वबाट ३३ करोड र अन्तरसरकारी वित्तीय हस्तान्तरण र बचतबाट दुई अर्ब ५९ करोड ९३ लाख ७१ हजार ५८२ रुपैयाँ प्राप्त गर्ने लक्ष्य लिइएको जानकारी दिइन्। यो बजेट चालु आर्थिक वर्षको तुलनामा १६ करोड बढीको छ।
सामाजिक र शैक्षिक विकासको लागि ९९ करोड ४२ लाख ५२ हजार ५८२ रुपैयाँ विनियोजन गरिएको छ। साथै, दूधमा दिइने प्रति लिटर दुई रुपैयाँ अनुदानको लागि ७० लाख, समग्र आर्थिक विकासका लागि ६ करोड १९ लाख ५० हजार विनियोजन गरिएको छ।
विकासका प्रमुख योजनामा एक वडा एक किलोमिटर सडक निर्माणको लागि १५ करोड, तिलोत्तमा बहुउदेश्यीय भ्यू टावरको निर्माण र संचालनको लागि एक करोड, सिटी कलेज सञ्चालन व्यवस्थापनको लागि ५० लाख, केउलानीमा स्किल ट्रेनिङ सेन्टर स्थापना गर्न २५ लाख राखिएको छ।
वडा भवन निर्माणको लागि ३ करोड, वडा कार्यालयका बाँकी संरचनाहरू जस्तै बाउन्ड्री वाल र सभाहल निर्माणको लागि २ करोड, र सडक मर्मतसम्भार र पूर्वाधार सुधारका लागि २ करोड विनियोजन गरिएको छ। समग्र पूर्वाधार विकासमा ९७ करोड ५८ लाख ३९ हजार विनियोजन गरिएको छ।
अन्तिम रूपमा, नगरको समग्र विकास र टोल विकास संस्थाको परिचालनका लागि ८० लाख र नगरपालिकामा कार्यरत करार कर्मचारी, नगर प्रहरीलाई सामाजिक सुरक्षा कोषमा समाहित गर्न र पूर्णता दिन १ करोड ५० लाख सहित कुल ५१ करोड ७३ लाख ५८ हजारको बजेट विनियोजन गरिएको छ।
