फायल तस्वीर
झापा । राष्ट्रिय प्रजातन्त्र पार्टी (राप्रपा)ले आइतबार बिहान ११ बजेबाट भेला भई काठमाडौँको बिजुली बजारमा प्रदर्शन गर्ने भएको छ ।
प्रदर्शनकारीहरूले निषेधित क्षेत्र तोड्ने अभिव्यक्ति दिएसँगै उपत्यका प्रहरी कार्यालयले प्रतिकारात्मक सुरक्षा योजना बनाएर लागु गरेको छ । जिल्ला सुरक्षा समितिबाट निर्णय गराएर सुरक्षा योजना लागु गरिएको उपत्यका प्रहरी कार्यालयका एसएसपी शेखर खनालले बताए ।
राप्रपाले प्रदर्शनको लागि जिल्ला प्रशासन
कार्यालयबाट अनुमति लिएको छैन । अनुमति नलिएको र निषेधित क्षेत्र तोड्ने
सुराक पाएसँगै निषेधित क्षेत्रमा सुरक्षा कडाइ गरिएको छ । एसएसपी खनाल ले निषेधित क्षेत्रमा सुरक्षाकर्मीको सङ्ख्या बढाएकाे बताए ।
प्रदर्शनकारीहरू भद्रकाली, बबरमहल र
बालुवाटारमा जम्मा हुन लागेका छन् । बालुवाटार स्थित प्रधानमन्त्रीको निवास
आसपासको निषेधित क्षेत्रमा पनि ठुलो सङ्ख्यामा सुरक्षा परिचालन गर्नेगरी
सुरक्षा योजना लागु गरिएको छ ।
जिल्ला सुरक्षा समितिबाट पारित सुरक्षा
योजना अनुसार प्रदर्शन स्थल र निषेधित क्षेत्रमा ब्याक सपोर्टको रूपमा
सशस्त्र प्रहरी पनि परिचालन गरिएको छ । जिल्ला प्रहरी परिसर काठमाडौँका
एसपी अपिल बोहराले सूचना सङ्कलन गर्न राष्ट्रिय अनुसन्धान विभागबाट
पनि सुरक्षाकर्मीहरू परिचालन गर्नेगरी योजना बनाएकाे जानकारी दिए ।
काठमाडौँ जिल्लाको सुरक्षा कमान्ड एसएसपी विश्व अधिकारीले गर्नेछन् । राप्रपाले प्रदर्शन अनुमति नलिएको हुनाले प्रदर्शन स्थलमा भेला भएकाहरूलाई निगरानी गर्ने र निषेधित क्षेत्रमा प्रवेश गर्न खोज्नेहरूलाई पक्राउ गर्ने सुरक्षा रणनीति छ ।
