झापा । झापा भद्रपुर ७ स्थित सङ्कटहरेश्वर विश्रान्ति घाटमा लगाइएको श्रीमद्भागवत सप्ताह ज्ञान महायज्ञमा ४७ लाख भन्दा बढी रकम दाताहरुबाट सहयोग भएको छ ।
ज्ञात अज्ञात समस्त पितृहरुको उद्दार गर्ने उदेश्यले भदौ ३० गते देखी असोज ६ सम्म सञ्चालन भएको पुराणमा ४७ लाख ९८ हजार ७ सय ८५ रुपैयाँ सहयोेग भएको थियो ।
पुराण आयोजक समितिले शुक्रबार पत्रकार सम्मेलनको आयोजना गरि हिषाब सार्वजनिक गरेको हो । समितिले दिएको जानकारी अनुसार पर्सादी सहयोगबाट १ लाख ६० हजार, मण्डप भेटीबाट १ लाख १४ हजार ८ सय ३६ रुपैयाँ, दान पेटिकाबाट २७ हजार १ सय ४३ रुपैयाँ , विभिन्न दाताबाट पुराण सहयोग वापत ४२ लाख ९८ हजार ४ सय ४६ रुपैयाँ, अक्षय कोष वापत ३१ हजार लगायतबाट आम्दानी भएको उल्लेख गरिएको छ ।
त्यसैगरी खर्च तर्फ पाण्डल निर्माण तर्फ २ लाख ४५ हजार, खाद्यन्य सामग्री तर्फ २ लाख ७१ हजार १ सय १३ रुपैयाँ लगायत गरी १९ लाख ६१ हजार २ सय २९ रुपैयाँ खर्च भएको समितिका कोषाध्यक्ष महतलाल राजवंशीले जानकारी गराएका थिए । आम्दानी र खर्च काटेर २८ लाख ३७ हजार ५ सय ५६ रुपैयाँ बचत गर्न सफल भएको उनले बताए ।
समितिका अध्यक्ष हरिप्रसाद निरौलाको अध्यक्षतामा भएको कार्यक्रमको सञ्चालन सचिव रेमनाथ चुडालले गरेका थिए ।
