साङ्केतिक तस्वीर
झापा । बिजुलीको पोलमा चढेर झापाको बिर्तामोडमा चोरी गर्न खोज्दा करेण्ट लागेर एक व्यक्ति गंभीर घाइते भएका छन् । करेण्ट लागेर नाम ,थर र वतन नखुलेका अन्दाजी २५ वर्षका पुरुष घाइते अवस्थामा फेला परेका थिए ।
आज बिहानको राति अन्दाजी १ः३० बजे बिर्तामोड नगरपालिका वडा न.२ स्थित राम चौकमा ट्रान्समिटरसहितको बिजुलीको पोलमुनि भुइँमा उनलाई इलाका प्रहरी कार्यालय बिर्तामोडबाट खटिएको गस्ती टोलीले उपचारका लागि बिर्तामोडस्थित बिएण्डसी अस्पताल बिर्तामोडमा भर्ना गरेको छ । उनको निधार र आँखाको डिलमा चोट लागेको छ भने शरीरको अन्य बिभिन्न भागमा जलेको छ । उनको अवस्था गम्भीर रहेको जनाइएको छ । उनको साथमा तार काट्ने ह्याक्सो ब्लेड, रेन्चहरु, प्लाष्टिकको बोरा र डोरी फेला परेको प्रहरीले जनाएको छ ।
