हचुमासा सामुदायिक वनको विवाद डिभिजन वन पुग्याे

झापा । झापाकाे एक सामूदायिक वनमा उत्पन्न विवाद डिभिजन वन कार्यालयमा पुगेकाे छ । उपभोक्ता समूहकी सचिव र लेखापालबाट आर्थिक कारोबारमा आशङ्का उब्जिएको भन्दै बढेको विवाद डिभिजन वन कार्यालय चन्द्रगढी पुगेकाे हाे ।

झापाको अर्जुनधारा–१ स्थित हचुमासा सामुदायिक वन उपभोक्ता समूहकी सचिव प्रभा नेपाल र सह–सचिव एवम् लेखाको जिम्मेवारी पाएका देउकुमार नेम्वाङको विषयलाई लिएर केही दिनअघि स्थानीय सरकारका जनप्रतिनिधिहरूले लेखा शाखामा तालाबन्दी गरेका थिए । उपभोक्ता समूहकी सचिव नेपालले आर्थिक अनियमितता गरेको भन्दै अर्जुनधारा–१ का वडाध्यक्ष उपेन्द्र बस्नेत, अर्का जनप्रतिनिधि मदन मगरलगायतको टोलीले कार्यालयको लेखा शाखामा तालाबन्दी गरेको थियो ।

उत्पन्न विवाद समाधान नभएपछि डिभिजन वन कार्यालयमा पुगेको वडाअध्यक्ष बस्नेतले बताए । अबको सबै काम डिभिजन वनले हेर्ने उनले जानकारी दिए । लेखा शाखामा लगाइएको ताला यथावत् रहेको उनले फोन सम्पर्कमा भने । घटनापछि सचिव नेपालले दिएको राजीनामा स्वीकृत र सह–सचिव एवम् लेखाको जिम्मेवारी पाएका नेम्वाङलाई निलम्बन गरिएको समूहका अध्यक्ष चन्द्र प्रसाईंले बताए । समूहमा भएको सत्य–तथ्यका बारेमा पाँच दिनभित्र लिखित जवाफ माग गर्दै डिभिजन वनबाट समूहमा बुधबार पत्र आएको उनले बताए । 

सचिव नेपालले गत आर्थिक वर्ष २०८०/०८१ को असार ३१ गते १७ किवी काठ विना बिल आफैले लगेको आरोप छ । अनियमितताका बारेमा कुरा उठेपछि उनले ५० दिनपछि आर्थिक वर्ष २०८१/०८२ को भदौ २० गते त्यसको रकम जम्मा गरेकी थिइन् । सचिवले बिल नगरी काठ बिक्री गरेको घटना सार्वजनिक भएपछि वडाध्यक्ष बस्नेत नेतृत्वको टोलीले लेखा शाखामा ताला लगाएको थियो ।