झापा । मुख्यमन्त्री केदार कार्कीलाई राप्रपाले विश्वासको मत नदिने भएको छ । अन्य दलहरूले विश्वासको मत दिने तयारी गरिरहँदा राप्रपाले भने पक्षमा मतदान नगर्ने जनाएको हो ।
‘हामीले कुनै निर्णय गरेका छैनौँ,’ राप्रपा संसदीय दलका नेता भक्तिप्रसाद सिटौलाले भने, ‘अहिलेसम्म विपक्षमा मतदान गर्नुपर्छ भनेर छलफल भइरहेको छ । भोलि बिहान १० बजे संसदीय दलको बैठक राखेका छौँ, त्यसले थप निर्णय गर्छ ।’
एमालेका ३९ र कांग्रेसका ८ सांसदको समर्थनमा कार्की कोशी प्रदेशको मुख्यमन्त्रीमा नियुक्त भएका हुन् । सत्ता गठबन्धनमा आबद्ध नेकपा (माओवादी केन्द्र)ले पनि कार्कीलाई विश्वासको मत दिने जनाएको छ । गठबन्धनको निर्णय विपरीत नेपाली कांग्रेसबाट विद्रोह गर्दै कार्की एमालेको सहयोगमा मुख्यमन्त्री बनेका हुन् ।
