झापा । दमकका एक व्यक्ति श्रीमतीलाई विष खुवाई मार्न खोजेकाे आराेपमा पक्राउ परेका छन् ।
पक्राउ पर्नेमा सप्तरी शम्भुनाथ नगरपालिका वडा नं. २ घर भई हाल दमक वडा नं.१ सुम्निमा टोलमा डेरा गरी बस्ने २५ वर्षीय दिलिपकुमार मरिक डोम रहेकाे जिल्ला प्रहरी कार्यालय झापाले जनाएकाे छ ।
गत चैत १० गते बिहान ८ बजे डोमले आफ्नै श्रीमती रेणु मरिकलाई बिष सेवन गराई ज्यान मार्न खोजेकाे जिल्लाका डिएसपी खगेन्द्रबहादुर खड्काले जानकारी दिए ।
घटनापछि फरार रहेका उनलाई इलाका प्रहरी कार्यालय दमक र इलाका प्रहरी कार्यालय कल्याणपुर सप्तरीबाट खटिएको प्रहरी टोलीले आइतवार सप्तरीबाट पक्राउ गरेको उनले जनाए । उनलाई साेमबार इलाका प्रहरी कार्यालय दमकमा ल्याई बुझाइएको छ ।
झापा जिल्ला अदालतबाट ५ दिनको म्याद थप गरी ज्यान मार्ने उद्योग मुद्धामा थप अनुसन्धान भइरहेको प्रहरीले जनाएकाे छ ।
