साङ्केतिक तस्वीर
झापा । झापाका एउटै पालिका दुई वडा सदस्यहरुबीचको असफल प्रेम कहानीको भाइरल घटनालाई लुकाउन खोजिएको छ । एउटै पार्टीबाट निर्वाचित एउटै वडाका खुल्ला वडा सदस्यले धोका दिएको भन्दै दलित महिला सदस्यले सामाजिक सञ्जालमा दुवैको फोटोसहितको स्ट्याटस लेखेर विष सेवन गरेको घटना लुकाउन खोजिएको हो ।
विष सेवन गर्ने ती दलित महिला सदस्यलाई फेसबुकबाट त्यो स्ट्याटस हटाउन लगाइएको छ । विष सेवन गरेकी गम्भीर अवस्थाकी ती दलित महिला सदस्यलाई अस्पताल भर्ना गरिएको थियो । उपचारपछि उनलाई आज घर ल्याइएको छ । दुवै वडा सदस्य विवाहित हुन् । दुवैबीच अवैध सम्बन्ध बनेको थियो । दलित महिला सदस्यका श्रीमान् वैदेशिक रोजगारीमा छन् भने खुल्ला सदस्यका घरमा श्रीमती र छोरा छन् ।
विष सेवन गर्नुअघि ती दलित महिला सदस्यले सामाजिक सञ्जालमा यस्तो स्ट्याटस लेखेकी थिइन् , ‘मलाई फकाइयो र मलाई दुई तीन वर्षसम्म मायाको नाटक गरेर तपाईँको इच्छा पूरा गर्नुभयो । ठिक छ, त्यसपछाडि मैले पनि तपाईँलाई माया गर्न थालेँ। तपाईँले पनि मलाई अथाह माया गर्नुभयो तर पनि तपाईँले म अर्काको बुढी तपाईँ अर्काको बुढा हुनुहुन्थ्यो। त्यही भएर समस्या आयो । त्यो समस्या आउने पनि थिएन तर तपाईँले छिट्टै बेवास्ता गर्नुभयो। वार्डमा आउँदा नबोल्ने अनि हप्काउने, धम्काउने गर्नुभयो । तँ कसको उचालेकोमा लागेकी छेस् भन्दै गालीगलौज गरियो। तर विश्वास पनि म कसैको उचालेकोमा पनि लागेको थिइनँ ।जब कि तपाईँ र मेरो कुराहरू सुनिसकेपछि मलाई मेरो बुढाले पनि छोडिसकेको थियो। अनि बाँकी कुरा रह्यो मलाई विदेश पठाउने । हेरचाह म आफै गर्छु भनेर भन्नुभएको थियो। त्यही भएकोले गर्दाखेरि अब तपाईँलाई समस्या आयो तपाईँलाई समस्या आइसकेपछि तपाईँको बुढी अब मलाई हेर्न दिएन ।मलाई हेर्न नदिएपछि सम्झौतामै कागजहरू‘।। । ’
पहिला माया गरेर पछि ती खुल्ला वडा सदस्यले बेवास्ता गरेपछि आफूले आत्महत्या गर्न लागेको उनले उल्लेख गरेकी छन् । ती दलित महिला सदस्यको उपचार खर्च सम्बन्धित पालिकाले बेहोरेको बताइएको छ । बिरामी ठिक भएर आइसकेपछि आत्महत्याको प्रयास गर्नुपर्ने कारणबारे खोजी गरेर धोका दिने वडा सदस्यकहाँ जाने पीडित दलित महिला सदस्यका एक आफन्तले बताए ।
