झापा / झापाकाे बिर्तामोडमा चोरीका घटना बढेसंगै प्रहरीले चोरीमा संलग्नहरुलाई धमाधम पक्राउ गर्न थालेको छ ।
गत फागुन २२ गते बिहान अन्दाजी ११ः३० बजे अर्जुनधारा वडा नं. ६ दालपुलस्थित इन्दिरा रिजाल संग्रौलाको घरबाट चोरी गर्नेहरु पक्राउ परेका हुन् । पक्राउ पर्नेमा बिर्तामोड २ चारपाने बस्ने २८ वर्षीय सुरज राई ,चोरीको गर–गहना खरिद गर्ने बिर्तामोड १ नारायण चोक बस्ने ४९ वर्षीय अरविन्दकुमार विश्वकर्मा (कालिगढको रुपमा कार्यरत) र शेरावाली ज्वेलर्स बिर्तामोडका संचालकका छोरा सुभान्सु साह रहेकाेे प्रहरीले जानकारी दिएकाे छ ।
उनीहरुले संग्रौलाको घरबाट १० तोला बराबरको सुनको बाला, तिलहरी, सिक्री, मंगलसुत्र, नौगेडी, झुम्का, हिराको औठी,६ तोला बराबरको चाँदीको पाउजु लगायतका गरगहना चोरी गरेका थिए । राईले चोरी गरेको गरगहना विश्वकर्मालाई बिक्री गरेका थिए भने विश्वकर्माले साहलाई बिक्री गरेका थिए । चोरी गरेको ६.९९५ तोला सुन गालेर ढिक्का बनाईराखेको अबस्थामा बिर्तामोड वडा नं. ५ हिकोला रोडस्थित शेरावाली ज्वेलर्सबाट बरामद भएको प्रहरीले जनाएकाे छ ।
उनीहरुलाई झापा जिल्ला अदालतबाट ४ दिनको म्याद थप गरी अनुसन्धान भइरहेको प्रहरीले जानकारी दिएकाे छ ।
