झापा / नागरिक उन्मुक्ति पार्टीका संरक्षक रेशमलाल चौधरीले पार्टी छाडेको घोषणा गर्दै नयाँ पार्टी खाेल्ने बताएका छन् ।
उनले नयाँ राजनीतिक दल ‘नेपाल नागरिक उन्मुक्ति पार्टी ’ गठन गरेर अघि बढ्ने घोषणा गरेका छन् । नयाँ दलको चुनाव चिह्न ‘पहिचान’ प्रस्ताव गर्दै नाउपाबाट अलग भएको चौधरीले स्पष्ट पारेका हुन् ।
उनले भने, ‘आजबाट म नाउपाबाट अलग भएको घोषणा गर्दछु। उन्मुक्ति पार्टीमा म आजबाट हुन्न। अलग अभियानको घोषणा गर्छु। मसँगै मेरा भावना, मेरो आन्दोलनको मर्म बुझ्ने साथीहरूले हातेमालो गर्नुहुनेछ भन्ने मैले विश्वास लिएको छु,’ उनले भने।
आफ्नाे सामाजिक सञ्जालमा भिडियाे सन्देशमार्फत चौधरीले वर्तमान राजनीतिको अवस्था प्रतिशोधपूर्ण र इर्ष्यायुक्त भएको भन्दै टिकापुर घटनामा आफू निर्दोष रहे पनि राजनीतिक प्रतिशोधस्वरूप घर जलाइएको गुनासो गरेका छन् । चाैधरीले टिकापुरमा भएको क्षतिपूर्तिमा व्यापक अनियमितता भएको दाबी गर्दै, ५० हजार क्षतिको दाबी गर्नेले डेढ करोडसम्म पाएको आराेप लगाएका छन्।
उनले लाल आयोगको प्रतिवेदन सार्वजनिक गर्न, राज्य पुनःसंरचना तथा सीमाङ्कन परिमार्जन गर्न र आफ्ना मुद्दामा न्यायिक निर्णय आउनुपर्ने माग गरेका छन्। साथै, उनले देशमा निजी तथा सार्वजनिक सम्पत्तिमा क्षति पुर्याउनेहरूलाई छानबिन गरी कारबाही गर्नुपर्नेमा जोड दिएका छन् ।
