झापा । एक महिनाको अवधिमा बिर्तामोडस्थित कृषि थोक बजारबाट एक करोड पाँच लाख ९० हजार ८०० को केरा बिक्री भएको छ । इलामको दानाबारी, महमाई र झापाको खुदुनाबारी, शनिश्चरे, मेचीनगर, भद्रपुरलगायत स्थानबाट केरा बिक्रीका लागि किसान यहाँ आउछन् ।
दसैँ, तिहार र छठ पर्वको अवसरमा १९ हजार २५६ घरी केरा औसतमा प्रतिघरी
रु ५५० का दरले बिक्री भएको कृषि बजार व्यवस्थापन समितिकी तथ्याङ्क सहायक
अधिकृत माया राजवंशीले जानकारी दिए । गत असोज १० गतेदेखि
कात्तिक १२ गतेसम्ममा सो मात्रामा केरा बिक्री भएको उनले बताए ।
उनका अनुसार यहाँबाट विराटनगर, जनकपुर, काठमाडौँलगायत स्थानमा
न्यूनतम ३०० देखि अधिकतम रु ८०० सम्ममा मालभोक, भण्डारी, जाहजी र
चिनीचम्पा केरा जाने गरेको छ । दसैँ र तिहारमा भन्दा बढी छठपर्वमा
केरा बिक्री भएको बताए ।
यहाँ ठूलो व्यापारिक केन्द्रका रूपमा रहेको उक्त थोक बजारमा
ताप्लेजुङ, पाँचथर, इलामलगायत पहाडी जिल्लामा उत्पादित कृषिजन्य वस्तुको
विषादी मापन गर्ने प्रयोगशाला पनि छ । तथ्याङ्क सहायक अधिकृत राजवंशीले
यहाँ आएका फलफूल, तरकारीलगायत कृषिजन्य वस्तुको विषादी चेकजाँचपछि मात्र
खानयोग्यलाई बजार पठाउने गरिएको जानकारी दिए।
