झापा । झापामा ५६८ वटा वाणिज्य फर्म तथा लघु उद्योगहरु बन्द भएका छन् ।
घरेलु तथा साना उद्योग कार्यालय झापाका सूचना अधिकारी जानकी भट्टराईका अनुसार गएको वर्षमा मात्र खासगरी गाउँघरमा खुलेका लघु उद्योग र वाणिज्य फर्महरु बन्द हुन थालेको भट्टराईले बताइन् । उनका अनुसार स्वरोजगारको राम्रो थलो मानिएका घरेलु तथा साना लघु उद्योगहरु धमाधम बन्द हुन थालेका छन् ।
प्रदेश सरकारबाट नवीकरणमा ढिलाई हुनेलाई विशेष छुट दिएकाले पुराना उद्योगले नवीकरण गरेकाले राजश्व भने केही बढेको उनको भनाइ छ ।
पोल्ट्री फार्म र कृषि क्षेत्रका लघु उद्योगहरु पनि बन्द हुन थालेका छन् । बैंक तथा वित्तीय संस्थाको सहयोग नपाउँदा धेरै व्यवसायीहरु पलायन हुनु परेको छ ।
पछिल्लो समय आर्थिक तरलता देखाउँदै बैंक तथा वित्तीय संस्थाले सहज लगानी गरेका छैनन् । राज्यको उचित नीति नहुँदा उत्पादन भएका वस्तुहरुको पनि सहज बजार नभएकाले धेरैजसो उद्योगीहरु विस्थापित बनेका छन् ।
