झापा / प्रतिनिधि सभाको बैठकमा सभामुख डाेल प्रसाद अर्यालले प्रयोग गरेका केही शब्दप्रति असन्तुष्टि जनाउँदै विपक्षी दलका सांसदहरूले ती अभिव्यक्ति संसद्को आधिकारिक रेकर्डबाट हटाउन माग गरेका छन्।
एमालेका प्रमुख सचेतक ऐन महरले सभामुख अर्यालले प्रतिनिधि सभा नियमावली २०७९ विपरीत बोलेकाले हटाउन माग गरेका हुन्।
सभामुख अर्यालले नै प्रतिनिधिसभा नियमावलीको गलत व्याख्या गरेको उनको भनाइ छ। प्रधानमन्त्रीले आकस्मिक रूपमा प्रश्नोत्तर कार्यक्रम सञ्चालन होस् भन्ने चाहेकामा विपक्षी दलहरूले नियमावलीको विषय उठाएपछि सभामुख अर्यालले नियमावलीको कुनै नियममा पनि १५ जनाले प्रश्न सोध्न पाउने भन्ने लिखित रूपमा छैन भन्ने धारणा व्यक्त गरेका थिए।
बैठकका क्रममा सभामुखले प्रयोग गरेको भाषाशैली निष्पक्ष र मर्यादित नभएको आरोप लगाउँदै विपक्षी सांसदहरूले आपत्ति जनाएका हुन्। उनीहरूले सभामुखले सबै दल र सांसदप्रति समान व्यवहार गर्नुपर्ने संवैधानिक दायित्व रहेको उल्लेख गर्दै विवादास्पद भनिएका शब्दहरू संसद्को रेकर्डबाट हटाउन माग गरेका छन्।
विपक्षी सांसदहरूले सभामुखको अभिव्यक्तिले संसद्को गरिमा र निष्पक्षतामाथि प्रश्न उठाएको दाबी गरेका छन्। उनीहरूले संसदीय अभ्यास र परम्पराअनुसार असंसदीय वा विवादास्पद अभिव्यक्तिहरू रेकर्डबाट हटाउने व्यवस्था रहेको भन्दै सोहीअनुसार कदम चाल्न आग्रह गरेका छन्।
