दुई नेताले हिउँले ढाकिएको अमेरिकी राज्य अलास्कालाई वार्तास्थल रोजेका हुन् । सुरुमा पुटिनले युएईको दुबईमा वार्ता गर्ने चाहना राखेपनि अमेरिकी राष्ट्रपति ट्रम्पको आग्रहमा अलास्कामा वार्ता हुने भएको हो ।
सुरक्षाको दृष्टिले यो वार्ता अलास्काको एङ्कोरोजमा रहेको अमेरिकी सैन्य अखडामा हुनेछ । दुई नेताबिच नेपाली समय अनुसार आजराति सवा १ बजे वार्ता हुँदैछ । केही घण्टा मात्रै चल्ने यो वार्तामा रुसलाई युद्धविरामको लागि मनाउने अमेरिकी प्रयास हुनेछ । तर युक्रेनको अनुपस्थितिमा हुने वार्ताले दिगो शान्ति खोज्न नसक्ने विश्वका नेताहरुको धारणा छ ।
६ वर्षमा पहिलो पटक हुन लागेको ट्रम्प–पुटिन प्रत्यक्ष वार्ताले युद्ध रोक्ने बिकल्पमाथि खुला छलफल गर्नेछ । वार्तामा रुसले आफ्नो पुरानै अडान कायम राख्ने बुझिएको छ ।
रूसले आंशिक रूपमा कब्जा गरेको युक्रेनी क्षेत्रहरू डोनेट्स्क, लुहान्स्क, खेरसन र जापोरिजियाको भविष्य के हुने भन्नेमा वार्ता केन्द्रित हुनेछ । यसैगरि युक्रेनलाई निशस्त्रीकरण गराउने, नेटो तथा अन्य पश्चिमी सैन्य गठबन्धनमा सामेल नहुने ग्यारेन्टी गराउने रुसी चाहना छ ।
