झापा / गत असार ४ गतेदेखि बन्द गरिएका चिया उद्योग तथा वगानहरु आजबाट खुल्ने भएका छन् ।
भारतीय चिया बोर्डले जारी गरेको नयाँ स्ट्यान्डर्ड अपरेटिङ प्रोसिजर (SOP) का कारण चिया निर्यातमा कठिनाइ भएकाे र पटकपटक सम्बन्धित
निकायमा हारगुहार गरेपनि सुनुवाई नभएकाे भन्दै बन्द गरिएकाे थियाे ।
निकायमा हारगुहार गरेपनि सुनुवाई नभएकाे भन्दै बन्द गरिएकाे थियाे ।नेपाल सरकारले समस्या समाधानका लागि विशेष कार्यदल गठन गरेपछि र प्रधानमन्त्री कार्यालयबाट कूटनीतिक पहलको आश्वासन पाएपछि नेपाल चिया उत्पादक सङ्घले बन्द रहेका उद्योगहरू आजैका मितिदेखि पुनः सञ्चालन गर्ने प्रेस विज्ञप्ति जारी गर्दै निर्णय गरेको हो।
भारतीय नीतिका कारण चिया निर्यात रोकिँदा झापा र इलामका चिया उद्योगहरू गम्भीर संकटमा परेका थिए। सरकारले बेलैमा सुनुवाइ नगरेको भन्दै व्यवसायीहरूले आन्दोलन स्वरूप उद्योगहरू बन्द गरी पत्रकार सम्मेलन र विज्ञप्ति मार्फत आफ्नो विरोध सार्वजनिक गरेका थिए।
चिया निर्यातमा देखिएका व्यापारिक तथा प्राविधिक समस्या समाधान गर्न, किसानका समस्या पहिचान गर्न र नेपाली चियाको अन्तर्राष्ट्रिय बजार प्रवर्द्धन गर्ने दीर्घकालीन जिम्मेवारीसहित नेपाल सरकारले विशेष कार्यदल गठन गरेको कार्यलाई सङ्घले सकारात्मक रूपमा लिएको छ।
यसैक्रममा नेपाल चिया उत्पादक सङ्घका अध्यक्ष आदित्य पराजुलीको नेतृत्वमा राजधानी पुगेको प्रतिनिधिमण्डललाई सम्माननीय प्रधानमन्त्रीको कार्यालयबाट कूटनीतिक तथा प्रशासनिक पहल गर्ने स्पष्ट आश्वासन प्राप्त भएको छ।
बगानमा किसानहरूको हरियो चियापत्ति हुर्कँदै गएको संवेदनशील अवस्था र चिया मजदुरहरूको दैनिक गुजारामा परेको प्रत्यक्ष असरलाई मध्यनजर गर्दै सङ्घले उद्योगहरू सधैँका लागि बन्द गरिरहनु उपयुक्त नहुने ठहर गरेको हो।
सङ्घले आफ्नो मागमा ऐक्यबद्धता जनाउने सम्पूर्ण चिया उद्योगी, किसान, मजदुर, राजनीतिक दल, वस्तुगत संघ–संगठन, नेपाल उद्योग वाणिज्य महासङ्घ तथा सञ्चारकर्मीहरू प्रति हार्दिक आभार प्रकट गर्दै चिया क्षेत्रको दिगो समाधानका लागि नेपाल सरकारप्रति धन्यवाद समेत व्यक्त गरेको छ।
