झापाको बिर्तामोडमा सञ्चालित म्यानपावरहरूमा छापा मारेर ९ वटा पासपोर्ट जफत गरेको छ । वैदेशिक रोजगारीको सेवा प्रवाह गर्ने नाममा म्यानपावरहरूबाटै ठगिने क्रम बढेको र कानुनी प्रक्रिया पूरा नगरी सञ्चालन गरेको म्यानपावरहरूमा जिल्ला प्रशासन कार्यालय र श्रम कार्यालय भद्रपुरले संयुक्त रुपमा सोमबार अनुगमन गरेको हो । झापाका सहायक प्रमुख जिल्ला अधिकारी तेजप्रकाश प्रसाईँको नेतृत्वमा गएको टोलीले तीन वटा म्यानपावरको अनुगमन गरेको थियो ।
टोलीले वीरेन्द्र थापाले सञ्चालन गरेको अलमाईटी इन्टरनेशनल म्यानपावरको शाखा कार्यालयबाट ९ वटा पासपोर्ट जफत गरेको छ । त्यस्तै चन्द्रप्रसाद पौडेलले सञ्चालन गरेको लुम्बिनी दर्शन र भीम विष्टले सञ्चालन गरेको स्क्यान म्यानपावरको अनुगमन गरेको जनाइएको छ ।
यी म्यानपावरहरूले शाखा नवीकरण नगरेको पाइएकोले नवीकरण गरेको प्रमाण पेस गर्न निर्देशन दिइएको छ । नवीकरण नगरी वैदेशिक रोजगारीमा पठाउन नमिल्ने कानुनी प्रावधान भए पनि बिर्तामोडमा सञ्चालित अधिकांश म्यानपावरहरूले आफूखुसी काम गर्दै आएको जनाइएको छ ।
