झापा । सुनको भाउ प्रतितोला २ लाख रुपैयाँसम्म पुग्ने अन्तर्राष्ट्रिय बजारले आंकलन गरेको छ । आगामी ५–६ महिनाभित्र नेपालमा नै सुनको मूल्य प्रतितोला करिब २ लाख पुग्ने आँकलन छ ।
सन् २०२७ सम्म ३ हजार प्रतिआउन्स पुग्ने अन्तर्राष्ट्रिय प्रक्षेपण सन् २०२५ मै पूरा हुने अनुमान गरिएको छ । अन्तर्राष्ट्रिय बजारमा सुन प्रतिआउन्स (२.६६ तोला) करिब २७ सय अमेरिकी डलर छ ।
नेपालमा पछिल्लो समय सुनको भाउ बढेको बढ्यै छ । सुनको भाउले नयाँ माथि नयाँ रेकर्ड बनाउँदै गएको छ । यो हप्ता मात्रै सुनको भाउ प्रतितोला १ लाख ६४ हजार ४ सय पुगेको छ ।
बिहीबार १ लाख ६२ हजार ४ सय रहेको सुन शुक्रबार प्रतितोला २ हजारले बढेको हो । दशैँपछि खुलेको बजारमा सुन प्रतितोला १ लाख ६० हजार ५ सय थियो ।
एक सातामै सुन प्रतितोला ३ हजार ९ सयले बढेको छ । दशैँअघि असोज २३ गते सुन १ लाख ५९ हजार १ सय थियो । चाँदी भने प्रतितोला १ हजार ९ सय ८० रहेको छ ।
अमेरिका र युरोपका राष्ट्रिय बैंकहरूले ब्याजदर घटाउँदा त्यसको असर सुनमा देखिएको नेपाल सुनचाँदी व्यवसायी महासंघका उपाध्यक्ष राजु धमलाले जानकारी दिए । अन्तर्राष्ट्रिय बजारमा नै सुनको माग बढ्दा भाउ बढेको उनको भनाइ छ ।
संसारभर नै अशान्ति भइरहेकाले ठुला लगानीकर्तालाई लगानीका बाटा धेरै नहुँदा सुनमा आकर्षण बढेको उनी बताउँछन् ।
मध्यपूर्वी एसियामा भइरहेको द्वन्द्व सुनको मूल्यवृद्धिको कारण बनिरहेको छ । इजरायल र हमासबीच जारी द्वन्द्व, लेबनानसँग पनि द्वन्द्व छेडेको र इरानलगायतका देशहरूले पनि के गर्छन् भन्ने अन्योलको स्थिति रहेको हुँदा सुरक्षित लगानीको रूपमा सुनलाई लिइएको विश्लेषण छ ।
अमेरिकी मुद्राको उचारचढावले पनि सुनमा लगानी बढाएको हो । छिमेकी राष्ट्रहरू चीन, भारत तथा रसियाले धेरै मात्रामा सुनको खरिद गरी सञ्चिति बढाउँदा पनि सुनको भाउ बढेको हो ।
धमलाका अनुसार प्रतिदिन करिब ४० किलोको सुनको बजार अहिले करिब १२–१५ किलोमा सीमित भएको छ । गत वर्षको चाडपर्व र अहिले चाडपर्वमा सुनको खपत घटेको उनी बताउँछन् ।
