झापा / मलेसियाले १६ वर्षमुनिका बालबालिकालाई सामाजिक सञ्जाल खाता खोल्न तथा सञ्चालन गर्न प्रतिबन्ध लगाउने नयाँ नियम कार्यान्वयनमा ल्याएको छ। यो व्यवस्था जुन १ देखि लागू भएको हो।
नयाँ नियमअनुसार फेसबुक, इन्स्टाग्राम, टिकटक, युट्युब लगायत मलेसियामा ८० लाखभन्दा बढी प्रयोगकर्ता भएका सामाजिक सञ्जाल प्लेटफर्महरूले उमेर प्रमाणीकरण (Age Verification) अनिवार्य गर्नुपर्नेछ। १६ वर्षभन्दा कम उमेरका प्रयोगकर्तालाई नयाँ खाता खोल्न नदिइने तथा पहिलेदेखिका खाताहरू पनि पहिचान गरी नियन्त्रण गरिने जनाइएको छ।
मलेसियाको सञ्चार तथा मल्टिमिडिया आयोग (MCMC) का अनुसार बालबालिकालाई हानिकारक सामग्री, साइबर बुलिङ, अनलाइन दुर्व्यवहार तथा सामाजिक सञ्जालको लतबाट जोगाउने उद्देश्यले यो कदम चालिएको हो।
नियम उल्लंघन गर्ने सामाजिक सञ्जाल कम्पनीलाई १ करोड मलेसियन रिङ्गिट (करिब २५ लाख अमेरिकी डलर) सम्म जरिवाना हुन सक्ने व्यवस्था गरिएको छ।
यस निर्णयलाई लिएर मलेसियामा मिश्रित प्रतिक्रिया देखिएको छ। धेरै अभिभावकले बालबालिकाको सुरक्षाका लागि आवश्यक कदम भन्दै स्वागत गरेका छन् भने केही अधिकारकर्मी तथा विज्ञहरूले गोपनीयता, निगरानी र अभिव्यक्ति स्वतन्त्रतामाथि असर पर्ने चिन्ता व्यक्त गरेका छन्।
मलेसिया सामाजिक सञ्जालमा बालबालिकाको पहुँच सीमित गर्ने कदम चाल्ने विश्वका पछिल्ला देशमध्ये एक बनेको छ। यसअघि अष्ट्रेलिया लगायतका देशहरूले पनि यस्तै कडा नियम लागू गर्ने प्रक्रिया अघि बढाइसकेका छन्।
