झापा / काठमाडौंको सुन्दरीजलबाट प्रहरीले ३० किलो अवैध लागूऔषध गाँजासहित दुई जनालाई पक्राउ गरेको छ।
पक्राउ पर्नेहरूमा सिन्धुपाल्चोकको मेलम्ची नगरपालिका–३ हैबुङ घर भई हाल काठमाडौंको कागेश्वरी मनहरा नगरपालिका–२ आलापोटमा डेरा गरी बस्ने २६ वर्षीय अवतार सिंह तामाङ र सुन्दरीजल बस्ने ५४ वर्षीय अम्बक तामाङ रहेका छन्।
जिल्ला प्रहरी परिसर काठमाडौंका अनुसार गएराति करिब १:०० बजे बा ८३ प ४३७७ नम्बरको मोटरसाइकलमा सवार उनीहरूलाई शङ्का लागेर जाँच गर्ने क्रममा उक्त परिमाणको गाँजा बरामद भएको हो।
प्रहरी वृत्त बौद्धबाट खटिएको विशेष टोलीले उनीहरूलाई नियन्त्रणमा लिएको हो। पक्राउ परेका दुवै जनालाई आवश्यक अनुसन्धान तथा कारबाहीका लागि प्रहरी वृत्त बौद्धमा राखिएको र घटनाबारे थप अनुसन्धान भइरहेको प्रहरीले जनाएको छ।
