झापा । झापाको भद्रपुरमा किशोरीहरुको लागि जीवन उपयोगी सीपसम्बन्धी आत्मरक्षा तालिम सम्पन्न भएको छ ।
मेची रंगशालाको कभर्ड हलमा भएको तालिममा भद्रपुर वडा नम्बर ७, ८, ९ र १० का विद्यालयहरुका कक्षा ८, ९ र १० मा अध्ययनरत ६५ जना किशोरीहरु सहभागी थिए ।
भद्रपुर नगरपालिकाले आयोजना गरेको तालिम समुदाय–प्रहरी साझेदारीअन्तर्गत किशोरीहरुलाई लक्षित जनचेतनामुलक प्रशिक्षण प्रदान गरिएको थियो ।
भद्रपुर नगरपालिकाको सामाजिक विकास शाखाले संयोजन गरेको तालिममा प्रहरी चौकी जलथलका प्रमुख प्रहरी सहायक निरीक्षक ओमराज पौडेलले लागुऔषध, घरेलु हिंसा, महिला तथा बालबालिकामाथि हुने अपराधका विषयमा जनचेतनामुलक प्रशिक्षण प्रदान गरेका थिए ।
त्यस्तै, भद्रपुर नगरपालिका सामाजिक विकास शाखाका सञ्जु कोइराला, कराते प्रशिक्षक सौरभ प्रधान, आत्मरक्षा प्रशिक्षक सम्झना सारु मगर र विद्यालय नर्स रविना राजवंशीले समेत सहभागीहरुलाई प्रशिक्षण प्रदान गरेका थिए ।
भद्रपुर नगरपालिका कार्यपालिका सदस्य सीता ढकालले अध्यक्षता गरेको कार्यक्रममा भद्रपुर नगरपालिकाका नगर उपप्रमुख राधा कार्कीको प्रमुख आतिथ्य रहेको थियो ।
