झापा । नेपाल–भारत सीमावर्ती मेची नदीसहित झापाका विभिन्न नदी तथा खोला किनारमा व्रतालुहरुले अस्ताउँदो सूर्यलाइ अघ्र्य दिएका छन् । जिल्लाका मेचीसहित बिरीङ, मावा, कमल, कनकाई, माई, निन्दा, हडिया, अदुवा, देउनियाँ लगायतका नदी तथा खोला किनारहरूमा उनीहरुले अस्ताउँदै गरेको सूर्यलाइ अघ्र्य दिएका हुन् । सोमबार बेलुका अस्ताउँदो र मङ्गलबार बिहान उदाउँदो सूर्यलाई अघ्र्य दिएर छठ पर्व सम्पन्न हुनेछ ।
जिल्लाकै सबैभन्दा फराकिलो र लामबद्ध छठ पर्व मनाइने मेची नदी किनारमा नेपाल र भारत दुवै देशका व्रतालु परिवार एउटै स्थल बनाएर छठ मनाउँदै आइरहेको मैथिल समाज भद्रपुरका सचिव सुशील कर्णले बताए ।
भद्रपुर– ५ स्थित मेची नदी किनारको मसानघाटदेखि मेची पुलको मुख्य प्रवेशद्वार हुँदै देवी बस्तीसम्मको करिब डेढ किलोमिटरसम्म अन्दाजी ५ हजार घाट निर्माण गरिएको छ । मसानघाट पूर्व नदी किनारमा भारतीय नागरिकले पूजा स्थल बनाएर छन् ।
उता बिरिङ खोलामा यस वर्ष १७५ वटा घाट रहेको छ । गत वर्ष १५४ वटा घाट रहेका थिए । व्रतालुहरूको सङ्ख्या थपिएपछि यस वर्ष २१ वटा घाट थप्नु परेको श्री छठ समाज सेवा समितिकी अध्यक्ष सङ्गीता रौनियारले जानकारी दिइन् ।
