झापा । वर्षाका कारण आएको बाढीपहिरो र डुबानलगायत विपद्का घटनामा परी ज्यान गुमाउने झापाका चार मृतक परिवारलाई दुई लाखका दरले राहत बितरण गरिएको छ । राहत पाउनेहरुमा कमल गाउँपालिका– १ बस्ने मुसे भनिने ३५ वर्षीय टिकाराम चौधरी,कचनकवल– १ की १४ वर्षीया नेहारिका राजवंशी, झापा गाउँपालिका–४ बस्ने मन्जुहक मिया र गौरीगञ्ज –८ बस्ने लीलाबहादुर गिरीको परिवार रहेकाे जिल्ला प्रशासन कार्यालय झापाले जनाएकाे छ ।
चौधरी र राजवंशीको डुबेर मृत्यु भएको थियो भने मिया र गिरीको चट्याङ लागेर ज्यान गएको थियो । मृतक परिवारका सदस्यहरुलाई जिल्ला प्रशासन कार्यालयमार्फत दुई–दुई लाखका दरले राहत वितरण गरिएको सहायक प्रमुख जिल्ला अधिकारी सुरेश आचार्यले बताए । त्यस्तै जिल्लाका दुई अग्नीपीडित परिवारलाई १५–१५ हजारका दरले राहत वितरण गरिएको उनले जानकारी दिए । राहत पाउनेहरुमा गौरादह– ५ का रणबहादुर दनुवार र हल्दीबारी– ३ का तारावल्लब गिरी रहेका छन् । असोजको दोस्रो साता आएको अविरल वर्षाका कारण बाढीमा डुबेर झापामा ६ जनाको मृत्यु भएको थियो ।
गृह मन्त्रालयका प्रवक्ता सहसचिव ऋषिराम तिवारीले हालसम्म बाढीपहिरो प्रभावित २३ जिल्लाका मृतकका परिवारलाई राहत रकम वितरण गरिएको जानकारी दिए । उनका अनुसार हालसम्म विपद्मा परी ज्यान गुमाएका २३८ मृतकका परिवारलाई आर्थिक सहायतास्वरूप राहत रकम वितरण गरिएको छ ।
