झापा / राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार २०८२ सालमा देशभर ७ हजार ५४७ विपदका घटना भएका छन् । विपदका कारण १३ हजार ५०४ परिवार प्रतक्ष्य रुमपा प्रभावित भएका छन् ।
सामान्य सावधानी अपनाउँदा समेत रोक्न सकिने आगलागीको घटना सबैभन्दा धेरै रहेको प्राधिकरणको विवरणमा उल्लेख छ ।
बाढी पहिरो, भारी वर्षा, चट्याङ, वन डढेलो, हावाहुरी, हिउँ पहिरो जस्ता विपद र विपदजन्य घटनाका कारण ठूलो मात्रामा जनधनको क्षति हुने गरेको छ ।
झण्डै एक वर्षको अवधिमा ३ हजार ६५२ वटा आगलागीका घटना भएका छन् । आगलागीमा परेर मात्रै १०४ जनाको अकालमा ज्यान गएको छ । ५६३ जना घाइते हुँदा ४ हजार १८२ परिवार प्रत्यक्ष रुपमा पीडित भएका छन् ।
बाढीका कारण मात्रै ३२८ घटनामा ३९ जनाको निधन भएको छ । बाढीमा परेर २७ जना बेपत्ता हुँदा १४ जना घाइते भएका छन् । प्राधिकरणका अनुसार, ६२१ पहिरोका घटनामा परेर ७६ जनाको ज्यान गएको छ । यस्तै, भारी वर्षाको ४४६ घटनामा परेर ७ जनाको ज्यान गयो भने २० जना घाइते भएका छन् ।
त्यस्तै, ४१९ चट्याङका कारण ४८ जनाको ज्यान गयो । कूल ३१२ जना घाइते हुँदा ५२२ परिवार प्रत्यक्ष रुपमा प्रभावित भए । हावाहुरीका ४७७, वन डढेलाका ३२४, जनावर आक्रमणका ५०९ र लेक लाग्नुका १३१ घटना भएका छन् ।
प्राधिकरणका अनुसार यो विवरण गत वैशाख १ गतेदेखि यही चैत २४ गते सम्मको हो । एक वर्षको अवधिमा विपदमा मात्रै ४९० जनाको ज्यान जाँदा ३८ जना बेपत्ता भएका छन् । विपदका कारण १ हजार ९६५ जना घाइते भएका छन् ।
