झापा / भारतको बेंगलुरुको परप्पना अग्रहरा केन्द्रीय जेलमा केही कैदीहरूलाई 'भीआईपी ट्रिटमेन्ट' दिइएको एक गम्भीर घटना सार्वजनिक भएको छ ।
सामाजिक सञ्जालमा भाइरल भएको एक भिडियोमा ठुला अपराधमा संलग्न कैदीहरू मोबाइल फोन प्रयोग गर्दै र टीभी हेर्दै गरेको देखिएका छन् । यस मामिलामा आईएसआईएसका एजेन्टदेखि सिरियल बलात्कारी र हत्यारा उमेश रेड्डीसमेत सामेल छन् । जेलभित्रको यो 'भीआईपी ट्रिटमेन्ट'को खुलासा भएपछि सरकारले तत्काल छानबिनको आदेश दिएको छ ।
इन्डिया टुडेको रिपोर्टअनुसार विलासिताको जीवन बिताइरहेका कैदीहरूमा आईएसआईएस रिक्रुटर जुहैब हमीद शकील मन्ना पनि समावेश छन् । भिडियोमा जुहैब मन्नालाई आफ्नो फोन चलाउँदै गरेको र पृष्ठभूमिमा टीभी वा रेडियो बजिरहेको देख्न सकिन्छ । उनी कसैसँग कुरा गर्दै र चिया पिउँदै पनि देखिएका छन् । राष्ट्रिय अनुसन्धान एजेन्सीका अनुसार जुहैब मन्नाले कुरान सर्कल समूहमार्फत मुस्लिम युवाहरूलाई कट्टरपन्थी बनाएका, भर्ती गरेका र उनीहरूलाई आईएसआईएसमा सामेल हुनका लागि अवैध रूपमा टर्की हुँदै सिरिया पठाएका थिए ।
अर्को क्लिपमा, सिरियल बलात्कारी र हत्यारा उमेश रेड्डीलाई पनि जेलभित्र मोबाइल प्रयोग गरिरहेको देखिएको छ । रेड्डीलाई सन् १९९६ देखि २०२२ को बिचमा २० महिला बलात्कार र तीमध्ये १८ जनाको हत्या गरेको अभियोगमा दोषी ठहर गरिएको छ । उनको ब्यारेकमा टीभी सेट पनि देखिएको छ ।
रान्या राव सुन तस्करी प्रकरणमा पक्राउ परेका तरुण राजुका तस्बिरहरू पनि सार्वजनिक भएका छन्, जसमा उनलाई जेलभित्र फोन प्रयोग गर्दै र खाना पकाउँदै गरेको देख्न सकिन्छ । तरुणलाई जेनेभा भाग्ने प्रयास गर्दा पक्राउ गरिएको थियो ।
उनलाई सुन तस्करी नेटवर्कको मुख्य योजनाकारको रूपमा पहिचान गरिएको थियो, जसले कथित रूपमा दुबईमा एक वरिष्ठ आईपीएस अधिकारीकी छोरी रान्या रावलाई सुन आपूर्ति गरेका थिए ।
यस घटना सार्वजनिक भएपछि कर्नाटकका मुख्यमन्त्री सिद्धारमैयाले तत्काल घटनाको छानबिन गर्न आदेश दिएका छन् । जेल विभागले पनि आफ्नै स्तरमा छानबिन सुरु गरेको छ । समाचारमा जनाइएअनुसार यी भिडियोहरू सन् २०२३ देखि २०२५ को बिचका भएका जनाइएको छ ।
