झापा / उदयपुरको कटारी नगरपालिका–६ बाँकेटारस्थित शान्तिवन जंगलबाट प्रहरीले ठूलो परिमाणमा प्रतिबन्धित लागूऔषध गाँजा बरामद गरेको छ। प्रहरीले जंगलमा लुकाइछिपाइ राखिएको १ हजार १२२ किलो ६७ ग्राम गाँजासहित तीन जनालाई पक्राउ गरेको हो।
प्रहरीका अनुसार विशेष सूचना पाएपछि इलाका प्रहरी कार्यालय कटारीबाट खटिएको टोलीले सोमबार बिहान करिब ४ बजे शान्तिवन क्षेत्रमा खोजतलास गरेको थियो। त्यसक्रममा जंगलभित्र ५२ वटा बोरामा प्याक गरी लुकाएर राखिएको अवस्थामा गाँजा फेला परेको हो।
गाँजा ओसारपसारमा प्रयोग भएको बा.१६ च ५२६९ नम्बरको बोलेरो गाडीसमेत प्रहरीले नियन्त्रणमा लिएको छ।
पक्राउ पर्नेमा ताप्ली गाउँपालिका–१ डाँडागाउँका ५५ वर्षीय रामबहादुर मगर, २१ वर्षीय नेकबहादुर मगर र ४६ वर्षीय पृथ्वीराज मगर रहेका छन्। उनीहरूलाई गाँजा ओसारपसारमा संलग्न रहेको आरोपमा नियन्त्रणमा लिइएको जिल्ला प्रहरी कार्यालय उदयपुरले जनाएको छ।
बरामद गाँजा, बोलेरो र पक्राउ परेका तीनै जनालाई इलाका प्रहरी कार्यालय कटारीमा राखिएको छ। घटनाको थप अनुसन्धान भइरहेको प्रहरीले जनाएको छ।
कटारी क्षेत्रमा पछिल्लो समय गाँजा ओसारपसारविरुद्ध प्रहरीले निगरानी तथा कारबाही बढाएको देखिन्छ। यसअघि पनि कटारी–४ मरुवा खोलाबाट १९९ किलो ३२० ग्राम गाँजासहित एक जना पक्राउ परेका थिए।
