साङ्केतिक तस्वीर
झापा । कुकुरको टोकाईबाट झापाको कन्काई नगरपालिकामा एक ७ वर्षीय बालकको मृत्यु भएको छ ।
मृत्यु हुनेमा संखुवासभा चैनपुर नगरपालिका वडा न.७ घर भई हाल कन्काई नगरपालिका वडा नं. २ सुकेडाँगीमा डेरा गरी बस्ने कुमार रम्तेलका छोरा ७ वर्षीय प्रकाश रम्ते रहेकाे जिल्ला प्रहरी कार्यालय झापाले जनाएकाे छ ।
उनलाइ बिगत डेढ महिनाअघि कुकुरले टोकेको थियो । कुकुरले टोकेर अवस्था सामान्य रहेका कारण उपचार नगराई बसेकोमा हिजो बिहान ११ बजे बालकको स्वास्थ्यमा समस्या आएको थियो ।
उनलाई उपचारको लागि प्रादेशिक अस्पताल भद्रपुरमा लगी सामान्य उपचारपश्चात् थप उपचारको लागि काठमाडौँ लैजाने क्रममा बालकको स्वास्थ्यको अवस्था गम्भीर हुँदै गएपछि तत्काल हेटौडास्थित सीएमसी चुरी हिल अस्पतालमा भर्ना गरिएको थियो । त्यहाँ उपचार गर्ने क्रममा आज बिहान मृत्यु भएको प्रहरीले जनाएको छ । बालकको शव सोही अस्पतालमा रहेको छ ।
