झापा / नेकपा एमाले कोशी प्रदेश कमिटीले पार्टी निर्णयको विरूद्ध नबोल्न निर्देशन दिएको छ । दुई दिन धनकुटाको हिलेमा बसेको प्रदेश कमिटी बैठकमा केही नेताहरुलाई बोल्न दिइएको थिएन ।
बैठकमा ४२ जना सदस्यले आफ्नो धारणा राखे पनि केही सदस्यले पार्टी केन्द्रको निर्णय र साउन १२ मा जारी अन्तरपार्टी निर्देशन १२ को विपरीत विषय उठाउन खोजेकाले बोल्ने समय नदिइएको हो ।
यसैबीच, पूर्वराष्ट्रपति विद्यादेवी भण्डारी पुनः एमालेमा सक्रिय हुने चासो राखेपछि यस विषयमा पार्टीभित्र बहस गर्न खोज्नेहरूलाई रोक लगाइएको असन्तुष्ट नेताहरूले आरोप लगाएका छन् ।
पार्टी अध्यक्ष केपी शर्मा ओलीले साउन १२ गते अन्तरपार्टी निर्देशन १२ जारी गर्दै केन्द्रका निर्णय र विभिन्न निर्देशन मातहतका कमिटीमा पठाएका थिए ।
बैठकले विधान महाधिवेशन समेट्नुपर्ने विभिन्न विषयमा सुझाव संकलन गर्नका लागि नेकपा एमाले कोशी प्रदेशले सचिव राजकुमार भण्डारीको संयोजकत्वमा दश सदस्यीय कार्यदल गठन गरेको छ ।
