झापाको मेचीनगर–१५ ज्यामिरगढीस्थित भगवती लेमिनेट्स प्रालि (प्लाइउड उद्योग) मा सोमबार बिहान सुरु भएको आगलागी दुई दिनपछि पूर्ण नियन्त्रणमा आएको छ । काठको विशाल घाटगद्दी भएको कारण आगो निभाउन ६० घण्टा लागेको उद्योगका सञ्चालक सन्तोष आचार्यले बताउनुभयो ।
आगलागीबाट १५ करोडको भौतिक सम्पत्ति डढेर क्षति भएको सञ्चालक आचार्यको भनाइ छ । उहाँका अनुसार आगलागीबाट उद्योगको मुख्य ब्लक पूर्णरुपमा क्षतिग्रस्त भएको छ भने भण्डारण गरिएको ठूलो मात्रामा काठको गोलिया र उत्पादित प्लाई जलेर नष्ट भएको छ । यो प्लाइउड उद्योगमा दैनिक एक हजार दुई सय मजदूर काम गर्दै आएका थिए । आगलागी नियन्त्रणका लागि नेपाली सेना, सशस्त्र प्रहरी र नेपाल प्रहरीको टोली परिचालन गरिएको थियो ।
