झापा । दुर्गा प्रसाईंको आलोचना गरेको भन्दै एक पूर्व प्रहरी अधिकारीलाई राजधानी काठमाडौंमा दिनदहाडै उनका समर्थकले अभद्र व्यवहार गरेका छन् ।
प्रसाईँको अभियानको आलोचना गरेको भन्दै पूर्व प्रहरी नायब उपरीक्षक (डीएसपी) केपी शर्मा पन्थीलाई पशुपति क्षेत्रमा दिउँसै बाँधेर जुत्ताको माला लगाएर अभद्र व्यवहार गरिएको हो ।
शर्मालाई केही युवाले अब आइन्दा प्रसाईँको आलोचना नगर्नु भन्दै फलामे कुर्सीमा बाँधेर जुत्ताको माला लगाएका छन् ।
फलामे कुर्सीको पछाडि हात बाँधेर जुत्ताको माला लगाएर सम्मान गरिएको भन्दै भिडियो खिचेका युवाले अबदेखि प्रसाईँको आलोचना गरे जिब्रो काटिदिने चेतावनी दिएका छन् ।
‘अब यस्तो बोल्दै जानुभयो भने हाम्रो टोलीले जिब्रो कटिङ गर्छ, जिब्रो कटिङमात्रै होइन ठोक्दिन्छु, दुर्गा दाइले धेरै सहयोग गर्नुभएको छ, नत्र गोली हान्थेँ म,’ ती युवाले भनेका छन् ।
एक टेलिभिजनमा दिएको अन्तर्वार्तालाई लिएर पन्थीमाथि वैशाख २७ मा अभद्र व्यवहार भएको हो । पन्थीले दुर्व्यवहारविरुद्ध गौशाला प्रहरी वृत्तमा जाहेरी दिएका छन् ।
पन्थीको जाहेरीका आधारमा घटनामा संलग्न एक जनालाई नियन्त्रणमा लिइएको र अन्यको खोजी भइरहेको गौशाला प्रहरी वृत्तका प्रमुख केशवकुमार थेवेले जानकारी दिए ।
