झापा । वनमा आबद्ध महिला उपभोक्ताहरूका लागि दैनिक रुपमा आवश्यक घरायसी सामान बनाउने तालिम सञ्चालन गरेको छ । भद्रपुर नगरपालिका-९ स्थित चन्द्रगढी सामुदायिक वन उपभोक्ता समूहले वार्षिक कार्यक्रमअनुसार गरिबी न्यूनीकरण तथा महिला सशक्तीकरण कार्यक्रम अन्तर्गत महिला उपभोक्ताहरूका लागि साबुन, हार्पिक, सर्फ र फिनेल बनाउने तालिम सञ्चालन गरिएको समूहका कोषाध्यक्ष अनुज खतिवडाले जानकारी दिए ।
चार दिनसम्म चल्ने तालिमको बुधबार भद्रपुर नगरपालिका वडा न ९ का वडाध्यक्ष रामप्रसाद दाहालले उदघाटन गरे । वनका अध्यक्ष दुर्गाप्रसाद भट्टराईको अध्यक्षतामा आयोजित कार्यक्रममा प्रमुख अतिथि वडाध्यक्ष दाहालले तालिमबाट प्राप्त सीपलाई व्यवहारमा उतारी स्वरोजगार बन्न सहभागी महिलाहरूलाई आग्रह गरे ।
अध्यक्ष भट्टराईले तालिमको औचित्य प्रस्ट्याउँदै वनमा आबद्ध कोही परिवार वा उपभोक्ता सीपको अभावका कारण बेरोजगार बन्नु नपरोस् भन्ने उद्देश्यले तालिम आयोजना गरिएको उल्लेख गरे । उद्घाटन कार्यक्रमको सञ्चालन वनकी सदस्य मञ्जु अधिकारीले गरेकी थिइन् ।
यही असार ८ गते शनिबरसम्म सञ्चालन हुने तालिममा प्रशिक्षकको रुपमा रुद्रप्रसाद भट्टराई र सीता बानियाँ रहेको कोषाध्यक्ष खतिवडाले बताए ।
