झापा । हेटौँडामा दुई चिकित्सकहरूमाथि हातपात भएको छ । हेटौँडा उपमहानगरपालिका वडा नम्बर–१ मा रहेको सन्चो अस्पतालमा उनीहरूमाथि हातपात भएको हो ।
हेटौँडा अस्पतालमा कार्यरत एनएस्थेसिया विभागका डा. प्रशान्त बिडारी र सन्चो अस्पतालमा कार्यरत विकास थापा माथि हातपात भएको जिल्ला प्रहरी कार्यालय मकवानपुरले जनाएको छ । सन्चो अस्पतालमा बिरामी हेरेर फर्कने क्रममा केही युवाहरूले उनीहरू माथि हातपात गरेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक लक्ष्मी भण्डारीले जानकारी दिए ।
उनका अनुसार गत साउन २५ मा डेंगुबाट मृत्यु भएका राजेश प्रधानका आफन्तले बुधबार अस्पतालमा पुगेर चिकित्सक माथि अचानक हातपात गरेका हुन् । हातपातबाट डा. बीडारीको आँखा र अनुहारमा चोट लागेको छ भने डा. थापाको गाला र अनुहार सुनिएको छ ।
उपचारमा लापरबाही गरेको भन्दै घटनाको एक महिना पछि मृतकका आफन्तले चिकित्सक माथि हातपात गरेका हुन् । हेटौँडा–१२ पदमपोखरीका ४१ वर्षीय राजेश प्रधानको डेंगुको कारण मृत्यु भएको थियो । मृत्यु हुनुभन्दा ३ दिन अघि प्रधानलाई हेटौँडास्थित सन्चो अस्पतालमा ल्याएको थियो ।
डेंगु सङ्क्रमणपछि घरमै आराम गर्ने गएका प्रधानको स्वास्थ्य अवस्था जटिल बनेपछि थप उपचारका लागि भरतपुर लगिएको थियो । प्रधानको उपचारको क्रममा चितवनस्थित नयाँ मेडिकल कलेजमा मृत्यु भएको थियो । प्रधानलाई दोस्रो पटक डेंगु सङ्क्रमण पुष्टि भएको थियो भने उनलाई मधुमेह र उच्च रक्तचापको समस्या पनि रहेको थियो ।
प्रवक्ता भण्डारीका अनुसार घटना लगत्तै दुई पक्षलाई राखेर छलफल गराइएको र दुवै पक्ष कानुनी प्रक्रिया अनुसार अघि बढ्ने भएपछि डा. बिडारी र डा. थापाले जाहेरी दिने तयारी गरेका छन् । जाहेरी परेपछि थप प्रक्रिया अघि बढाउने उनले बताए ।
यता हेटौँडा अस्पतालका मेडिकल सुपरिटेन्डेन्ट डा. रामचन्द्र सापकोटाका अनुसार घटनाबारे अनुसन्धानसहित दोषी माथि कारबाहीको माग गर्दै प्रहरी समक्ष जाहेरी दर्ता गर्ने तयारी भइरहेको छ । घटनास्थलको प्रमाणका आधारमा चिकित्सक माथि हातपात गर्ने सबैलाई पक्राउ गरी कारबाही गर्ने गरी उजुरी दर्ता गरिने उनले बताए ।
