मुसलधारे वर्षाका कारण दक्षिण एशियाका केही देशमा बाढी र पहिरोका कारण झन्डै ६ सय जनाले ज्यान गुमाएका छन् ।
मनसुनी वर्षाले बाढी र पहिरोबाट इन्डोनेसिया, मलेशिया, थाइल्याण्ड र श्रीलङ्कामा लाखौं मानिसहरू प्रभावित भएका बीबीसीले जनाएको छ ।
श्रीलङ्काका राष्ट्रपति अनुराकुमार दिसानायकले खराब मौसमी प्रकोपको सामना गरिरहेको अवस्थामा सार्वजनिक आपतकालको घोषणा गर्नुभएको छ । घोषणाले सार्वजनिक सुरक्षा अध्यादेश अन्तर्गत आपतकालीन नियमहरू राष्ट्रव्यापी लागू गर्न सरकारलाई अधिकार प्रदान गर्छ ।
आपतकाल घोषणा गर्नुको उद्देश्य सार्वजनिक सुरक्षाको रक्षा गर्नु, राष्ट्रिय स्थिरता कायम राख्नु रहेको उल्लेख छ । श्रीलङ्का चक्रवात ‘दित्वाह’बाट प्रभावित भएकोमा एक सय ३० जनाभन्दा धेरैको ज्यान गएको छ । त्यहाँ झन्डै एक सय ७० जना बेपत्ता रहेको विपद् क्षेत्रका अधिकारीहरूले बताएका छन् ।
त्यस्तै इन्डोनेसियाली टापु सुमात्रामा ठूलो वर्षा भएको थियो । मङ्गलबारको मनसुनी वर्षाका कारण आएको बाढी र पहिरोमा परी ज्यान गुमाउनेको सङ्ख्या १ सय ६४ पुग्नुका साथै ७९ जना बेपत्ताको खोजी भइहेको छ ।
मलेशियामा पनि धेरै जनाको ज्यान गएको अनुमान गरिएको छ । जलवायु परिवर्तनले आँधीबेहरीको ढाँचामा परिवर्तन ल्याएको छ ।
