झापा । पछिल्लो पटक निकासी भएर भारतको भन्सार कार्यालय पुगेको
प्लाइउडको जाँचपास नगरी १२ दिनदेखि रोकिएको पाइएकाे छ । कोशी प्रदेशअन्तर्गत झापाको काँकडभिट्टा र मोरङको विराटनगर नाकाबाट निकासी
भइसकेपछि पानीट्याङ्की भन्सार र जोगबनी भन्सारले ट्रक रोकेर राखिदिएको
उद्योगीले गुनासो गरेका छन् । नेपालबाट
भारत निर्यात हुने प्लाइउडमा पुनः झमेला सिर्जना गर्दै भन्सारमा रोकिन
थालिएको उनीहरूकाे गुनासाे छ ।
पानीट्याङ्की भन्सारमा आठवटा र जोगबनी भन्सारमा छवटा ट्रक रोकिएको उनीहरूले बताएका छन् ।उद्योगीका अनुसार भारतको राजस्व अनुसन्धान विभाग (डिआरआइ) ले नेपालबाट निर्यात हुने प्लाइउडमा ब्युरो अफ इन्डियन स्टान्डर्ड (बिआइएस) मान्यताप्राप्त उद्योगले अन्य उद्योगको मालवस्तुसमेत निकासी गरेको आशङ्का गरिएको छ।बिआइएस मापदण्ड अनिवार्य गरेपछि केही उद्योगले मात्रै यसको मान्यता पाएका थिए तर बिआइएस मान्यता पाएका उद्योगले अन्य उद्योगका मालवस्तुसमेत निकासी गरेको आशङ्का गर्दै यसको भौतिक जाँच गर्न भन्सारमा रोकिएको बताइएको छ ।
मोरङ–सुनसरी औद्योगिक कोरिडोरमा स्थापित ग्रिन प्लाई उद्योगका सञ्चालक दिवाकर राठीका अनुसार भारतले बारम्बार नै नेपालबाट प्लाइउड निर्यातमा अवरोध गर्दै आएको छ ।
