झापा । झापाको दक्षिणी नाकाबाट प्रहरीले भारततर्फ तस्करी हुन लागेको ५० बोरा काक्राको बीउसहितको ट्रयाक्टर प्रहरीले नियन्त्रणमा लिएको छ ।
आज बिहान ४ः३० बजे इलाका प्रहरी कार्यालय कुमरखोदबाट खटिएको प्रहरी टोलीले झापा गाउँपालिका वडा नं.१ मा नम्बर प्लेट नखुलेको ट्रयाक्टरलाई शंका लागेर चेकजाँच गर्दा सामान फेला पारेकाे हाे ।
नेपालबाट भारततर्फ अवैध रुपमा भन्सार छली लाँदैं गरेको अवस्थामा ५० बोरा काक्राको बीउ फेला परेको जिल्ला प्रहरी कार्यालय झापाले जनाएकाे छ । प्रतिबोरा ५० के.जीका दरले काक्राको बीउ लोड रहेको जिल्लाका डिएसपी खगेन्द्रबहादुर खड्काले जानकारी दिए ।
अन्दाजी २ लाख ५० हजार बराबरको काक्राको बीउ र ट्रयाक्टरको मूल्य अन्दाजी ५ लाख गरी जम्मा ७ लाख ५० हजारको अवैध सामान आवश्यक कार्वाहीको लागि मेची भन्सार कार्यालय काँकडभिट्टा बुझाइएको छ भने ट्रयाक्टर चालकको खोजी जारी रहेको उनले बताए ।
