झापा / प्रधानमन्त्री बालेन्द्र शाह संयुक्त राष्ट्रसंघको ८१औँ महासभामा सहभागी हुन न्युयोर्क पुगेका छन्। प्रधानमन्त्री शाहले बिहीबार, सेप्टेम्बर २४ मा महासभाको उच्चस्तरीय ‘जनरल डिबेट’लाई सम्बोधन गर्ने कार्यक्रम रहेको छ।
महासभामा सम्बोधन गर्नुअघि प्रधानमन्त्री शाहले संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यसूची तय भएको छ। परराष्ट्र मन्त्रालयले पनि प्रधानमन्त्री शाहको न्युयोर्क भ्रमणका क्रममा महासचिव गुटेरेससँग भेट हुने पुष्टि गरेको छ।
महासभाको दिवासत्रमा प्रधानमन्त्री शाहको सम्बोधन १७औँ क्रममा रहेको बताइएको छ। उपलब्ध कार्यतालिकाअनुसार नेपाली समयअनुसार उनको सम्बोधन शुक्रबार बिहानतिर पर्नेछ। एक वक्ताका लागि सामान्यतः १५ मिनेट समय छुट्याइए पनि राष्ट्र तथा सरकार प्रमुखले आवश्यकताअनुसार थप समय लिन सक्ने बताइएको छ।
प्रधानमन्त्री शाहको सम्बोधनमा जलवायु परिवर्तन, जलवायु न्याय, कम कार्बन उत्सर्जन गर्ने मुलुकले भोगिरहेको क्षति तथा हालैको भोटेकोशी बाढीबाट नेपालमा परेको विनाशबारे विषय उठाउने तयारी रहेको छ। पर्वतीय मुलुकका समस्या तथा विश्व शान्तिमा नेपालको योगदानका विषय पनि सम्बोधनमा समेटिने अपेक्षा गरिएको छ।
संयुक्त राष्ट्रसंघको ८१औँ महासभाको उच्चस्तरीय सप्ताह सेप्टेम्बर २२ देखि २९ सम्म न्यूयोर्कमा चलिरहेको छ भने जनरल डिबेट सेप्टेम्बर २२ देखि २६ र २८ तारिखमा सञ्चालन हुँदैछ।
प्रधानमन्त्री शाहको यो भ्रमण पदभार ग्रहण गरेपछि भएको पहिलो प्रमुख अन्तर्राष्ट्रिय सहभागिताका रूपमा समेत हेरिएको छ। उनी सेप्टेम्बर २६ मा काठमाडौं फर्किने कार्यक्रम रहेको परराष्ट्र मन्त्रालयले जनाएको छ।
