झापा जिल्ला बिर्तामोड–२ चैतुवारीस्थित दुर्गा स्टिल प्रा.लि.का कामदार बस्ने आवासीय भवनमा आगलागी भएको छ। आज साँझ करिब ६:४० बजे भुइँतलामा रहेको भान्सा कोठाबाट ग्यास चुहावटका कारण अचानक आगो लागेको बताइएको छ।
आगलागीबाट भान्सा कोठासहित छेउमै रहेको सुत्ने कोठा जलेर नष्ट भएका छन्। साथै कामदारहरुको झण्डै १ लाख ५० हजार रुपैयाँ नगद, लत्ताकपडा र तीन थान मोबाइल फोन जलेर करिब ६ लाख रुपैयाँ बराबरको क्षति पुगेको प्रहरीले जनाएको छ।
स्थानीय बासिन्दाको सक्रिय सहयोगमा आगो साँझ ७:२० बजे पूर्ण रूपमा नियन्त्रणमा लिन सफल भएको थियो।
