झापामा ट्राफिक प्रहरीले नियमविपरीत कालो सीसा प्रयोग गर्ने सवारीसाधनमाथि कडा निगरानी र कारबाही अभियान सुरु गरेको छ। आपराधिक गतिविधि नियन्त्रण र सुरक्षा संवेदनशीलतालाई मध्यनजर गर्दै यस्तो अभियान सञ्चालन गरिएको जिल्ला ट्राफिक प्रहरी कार्यालय झापाले जनाएको छ।
जिल्ला ट्राफिक प्रहरी कार्यालयका प्रमुख प्रहरी निरीक्षक सन्तोष राईका अनुसार पछिल्ला दुई दिनमा २४ वटा चारपांग्रे सवारीबाट कालो सीसा हटाइएको छ। उनका अनुसार मंगलबार १५ वटा र बुधबार ९ वटा गाडीमा प्रयोग गरिएको कालो सीसा निकालिएको हो।
प्रहरीका अनुसार कालो सीसाको प्रयोग गरेर हतियार, लागूऔषध, सुन तथा अवैध मुद्रा ओसारपसार गर्ने, साथै फरार अपराधीहरू लुकिछिपी आवतजावत गर्ने घटनाहरू देखिन थालेपछि निगरानी कडा पारिएको हो। यस्तै हिंसाजन्य तथा दुर्व्यवहारसम्बन्धी घटनाहरूमा समेत वृद्धि हुन थालेपछि प्रहरीले विशेष चासो दिएको जनाएको छ।
सवारी तथा यातायात व्यवस्था ऐन, २०४९ को दफा ३९ अनुसार सम्बन्धित अधिकारीको स्वीकृतिबिना सवारीको रंग, सिट संख्या, स्वरूप, इन्जिन वा चेसिसमा परिवर्तन हुने गरी कुनै पनि हेरफेर गर्न पाइँदैन।
