सुनसरी जिल्लाको गढी गाउँपालिका वडा नम्बर ४, छिटाहा क्षेत्रमा लागू औषध ओसारपसार भइरहेको गोप्य सूचनाका आधारमा इलाका प्रहरी कार्यालय दुहवी र इलाका प्रहरी कार्यालय छिटाहाबाट संयुक्त रूपमा खटिएको प्रहरी टोलीले २६ किलो गाँजासहित दुई किशोरलाई पक्राउ गरेको छ।
प्रहरीका अनुसार उत्तरबाट दक्षिणतर्फ जाँदै गरेको स.२प. ७१४६ नम्बरको मोटरसाइकललाई छिटाहा नहर क्षेत्र नजिक चेकजाँच गर्ने क्रममा मोटरसाइकलमा राखिएको कालो झोला र बोरामा प्याक गरिएको अवस्थामा गाँजाजस्तो देखिने लागू औषध फेला परेको हो।
बरामद गरिएको लागू औषधको तौल २६ किलोग्राम रहेको जनाइएको छ।
उक्त मोटरसाइकल चलाइरहेका धनकुटा जिल्ला साँगुरीगढी गाउँपालिका वडा नम्बर ८ का १६ वर्षीय अतिस राई र पछाडि सवार छिटाहाका १९ वर्षीय विशाल राईलाई नियन्त्रणमा लिइएको छ।
प्रहरीले लागू औषध, मोटरसाइकल र सम्बन्धित युवाहरुलाई नियन्त्रणमा लिई इलाका प्रहरी कार्यालय दुहवीमा राखी थप अनुसन्धान जारी राखिएको जानकारी दिएको छ।
अनुसन्धानका लागि आवश्यक कानुनी प्रक्रिया अगाडि बढाइएको प्रहरीले जनाएको छ।
