झापा / खोटाङमा कुटपिटबाट एक शिक्षकको मृत्यु भएको छ ।
केपिलासगढी गाउँपालिका–७ सुङ्देलस्थित सूर्य माध्यमिक विद्यालयका शिक्षक भानुभक्त राईको सालपा पोखरी क्षेत्रमा बिहीबार राति कुटपिटबाट मृत्यु भएको प्रधानाध्यापक ललितचन्द्र राईले बताए ।
उनका अनुसार तीन दिन विद्यालय बिदा भएकाले सङ्खुवासभा पुगेर फर्किने भन्दै राई बिहीबार गाउँबाट हिँडेका थिए । जनैपूर्णिमा तथा ऋषितर्पणीको अवसरमा शुक्रबार सालपा पोखरीमा लाग्ने मेला भर्न सालपा क्षेत्रमा बसेको बेला राति करिब १२ बजे कुटपिटबाट मृत्यु भएको राईले जानकारी दिएका छन् ।
घटनास्थल भोजपुर जिल्लामा पर्ने भएकाेले आवश्यक अनुसन्धानका लागि प्रहरी टोली खटाएकाे जिल्ला प्रहरी कार्यालय भाेजपुरले जानकारी दिएकाे छ ।
