झापाको बिर्तामोड– ३ स्थित होटेल किंग्सवेरीको क्यासिनोमा जुवा खेल्दाखेल्दै एक भारतीय ढलेका छन् । गएराति ९.१० बजेतिर भारत उत्तर प्रदेश बस्ने ३६ वर्षीय सोनु सहनी किंग्सवेरीको क्यासिनोमा जुवा खेल्दाखेल्दै ढलेका हुन् । होटेल किंग्सवेरीमा विगत दुई दिनदेखि बस्दै आएका सहनी होटेलको क्यासिनोमा जुवा खेल्ने क्रममा प्रेसर हाईको कारण अचानक ढली बेहोस भएका थिए । सहनीलाई सोही होटेलका कर्मचारी नवीन पोखरेलले बिर्ता सिटी अस्पताल बिर्तामोड पुर्याएका थिए । उनको सोही अस्पतालमा उपचार भइरहेको छ ।
मादक पदार्थ सेवन गरेका सहनीले जुवामा हारेपछि ढलेको बताइएको छ । अस्पताल ल्याएपश्चात् सामान्य हातखुट्टा चलाउन थालेको, बोली नखुलेको र अवस्था मध्यम रहेको बताइएको छ । इलाका प्रहरी कार्यालय बिर्तामोडमा जानकारी गराउनसाथ प्रहरी टोली खटिएर घटनाबारे बुझ्ने कार्य भइरहेको जनाइएको छ ।
