झापा / रसुवाको भोटेकोशी नदीमा आएको विनाशकारी बाढीपछि कोशी प्रदेशका १३८ जना नागरिक अझै सम्पर्कविहीन रहेको पाइएको छ।
बाढी प्रभावित रसुवा, नुवाकोट, धादिङलगायतका क्षेत्रमा रोजगारी, व्यापार, पर्यटन, विभिन्न काम तथा धार्मिक भ्रमणका लागि पुगेका कोशी प्रदेशका नागरिक बाढीपछि परिवार तथा आफन्तको सम्पर्कमा नआएका हुन्। प्रदेश प्रहरी कार्यालय विराटनगरका अनुसार १५३ जनाको विवरण प्राप्त भएकोमा १५ जना सम्पर्कमा आएका छन् भने १३८ जनाको अवस्था अझै अज्ञात छ।
प्रहरीले उपलब्ध गराएको जिल्लागत विवरणअनुसार सबैभन्दा धेरै सोलुखुम्बुका ३९ जना सम्पर्कविहीन छन्। त्यसपछि ओखलढुंगाका २०, मोरङका १६, सुनसरीका १५ र उदयपुरका १५ जना सम्पर्कविहीन छन्।
त्यस्तै झापाका १०, खोटाङका ८, इलामका ७, संखुवासभाका ३, ताप्लेजुङका २, धनकुटाका २ र भोजपुरका १ जना सम्पर्कविहीन रहेको प्रहरीले जनाएको छ।
