ललितानिवास प्रकरणमा २१ मृतक प्रतिवादी

झापा । बालुवाटारस्थित ललितानिवासको १४३ रोपनी सरकारी जग्गा हडपिएको प्रकरणमा संलग्न २१ जनाको मृत्यु भइसकेको पाइएको छ ।

केन्द्रीय अनुसन्धान ब्यूरो (सीआईबी) ले गरेको सरकारी लिखत कीर्ते तथा संगठित अपराध अनुसन्धानका क्रममा छानबिनको दायरामा परेका राणा परिवार, कर्मचारी, जग्गा घुस पाउने नातेदार र मोहीहरुमध्ये २१ जनाको विभिन्न मितिमा मृत्यु भएको पाइएको हो ।

प्रकरणमा संलगन तत्कालीन भूमि सुधार तथा व्यवस्थामन्त्री प्रभुनारायण चौधरीको २९ भदौ २०६७ मा मृत्यु भएको विवरण प्रहरीले रायसहितको अनुसन्धान प्रतिवेदनमा संलग्न गराएको छ । भूमिसुधार तथा व्यवस्थापन विभागका पूर्वमहानिर्देशक मुकुन्दप्रसाद आचार्यको पनि मृत्यु भइसकेको छ । उनको २३ चैत २०७२ मा मृत्यु भएको भन्दै प्रहरीले मृत्यु दर्ता प्रमाण पत्र समावेश गरेको छ ।

समरजंग कम्पनीका पूर्वप्रमुख अर्जुनप्रसाद भण्डारीको पनि १५ साउन २०७७ मा मृत्यु भएको छ । राणा परिवारका शैलजा राणाको १३ भदौ २०६१, सुनिती राणाको १३ वैशाख २०७०, हेमन शमशेर जबराको २९ पुस २०६४ र रुक्म शमशेर जबराको २५ भदौ २०७८ मा मृत्यु भएको छ ।

मालपोत कार्यालय डिल्लीबजारका तत्कालीन नासु जगतप्रसाद पुडासैनीको १९ वैशाख २०७६ मा मृत्यु भएको छ । मालपोत कार्यालय डिल्लीबजारका तत्कालीन खरिदार युक्तप्रसाद श्रेष्ठको १२ साउन २०७६ मा मृत्यु भएको छ । भूमिसुधार तथा व्यवस्थापन विभागका तत्कालीन निर्देशक पुष्पराज उपाध्यायको २०७६ मा मृत्यु भएको छ ।

पूर्वशाखा अधिकृत मुरलीकृष्ण श्रेष्ठको २०४५ सालमै मृत्यु भइसकेको छ भने गुठी संस्थान केन्द्रीय कार्यालयका तत्कालीन कानून अधिकृत तुलसी पोखरेलको ६ चैत २०७० मा मृत्यु भएको छ ।

यसमा संलग्न मिठुदेवी चापागाईंको २०६४, सानुकान्छा भन्ने पञ्चनारायण महर्जनको २०६०, तीर्थमाया महर्जनको २०७५, सुष्मा बज्राचार्यको २०७०, बालकृष्ण महर्जनको २०६८, भरतराज गिरीको २०७१, आशाखा माया महर्जनको २०६०, परशुराम पोखरेलको २०७४ र हर्कनारायण डंगोलको २०७२ मा मृत्यु भइसकेको छ ।

सीआईबीले मृत्यु दर्ता प्रमाणसहितको विवरण समावेश गर्दै उनीहरुको सम्पत्तिबाट बिगो भराउनुपर्ने राय दिएको छ ।

‘मृतकहरुको हकमा कुनै माग दाबी नलिएको भए पनि सरकारी जग्गा झुठो र फरक व्यहोराको कीर्ते कागजातको आधारमा प्राप्त गरी लाभ प्राप्त गर्ने प्रतिवादीहरुको चल अचल सम्पत्ति तथा जायजेथाबाट विगो दिलाई भराई दिने मागदाबी लिइ दिनुहुन अनुरोध छ’, प्रहरीले बुझाएको रायसहितको प्रतिवेदनमा भनिएको छ । सीआईबीको राय अनुसार २१ जनाबाट १५ अर्ब ६३ करोड रुपैयाँ असुल्नुपर्ने देखिन्छ ।

सूची हेर्नुहोस् :

सि.नं.	नाम थर	परिचय	विगो मागदावी
१)	शैलजा राणा	राणा परिवार	३ अर्ब १० करोड
२)	सुनिती राणा	राणा परिवार	३ अर्ब १८ करोड
३)	हेमनशम्सेरज.व.रा.	राणा परिवार	२ अर्ब ८९ करोड
४)	रुक्मशम्सेर ज.ब.रा.	राणा परिवार	३ अर्ब १० करोड
५)	जगत प्र. पुडासैनी	कर्मचारी	२९ करोड ३२ लाख
६)	युक्त प्रसाद श्रेष्ठ	कर्मचारी	२९ करोड ३२ लाख
७)	पुष्पराज उपाध्याय	कर्मचारी	२९ करोड ३२ लाख
८)	मिठु देवी चापागाई	जग्गा बकस पाउने	१९ करोड ३० लाख
९)	सानु कान्छा भन्ने पंच नारायण महर्जन	मोही	१३ करोड ९० लाख
१०)	तिर्थमाया महर्जन	मोही	६३ करोड ५२ लाख
११)	सुष्मावज्राचार्य शाक्य	जग्गा किन्ने व्यक्ति	५ करोड ४१ लाख
१२)	मुकुन्द प्र. आचार्य	कर्मचारी	२९ करोड ३२ लाख
१३)	अर्जुन प्रसाद भण्डारी	कर्मचारी	३० करोड ४४ लाख
१४)	तुलसी पोखरेल	कर्मचारी	१ करोड ८ लाख
१५)	बालकृष्ण महर्जन	मोही	१ करोड २१ लाख
१६)	भरतराज गिरी	मोही	१ करोड ९१ लाख
१७)	आशामाया महर्जन	मोही	१ करोड २१ लाख
१८)	मुरलीकृष्ण श्रेष्ठ	कर्मचारी	१ करोड ११ लाख
१९)	पर्शुराम पोखरेल	कर्मचारी	१० करोड ५१ लाख
२०)	हर्क नारायण डंगोल भन्ने हर्ष महर्जन	मोही	३ करोड २४ लाख
२१)	प्रभु नारायण चौधरी	मन्त्री	६३ करोड १० लाख