झापा । वेवारिसे अवस्थामा रहेकाे १२ लाख बढीको साखु जातकाे काठ बरामद भएको छ । झापाको अर्जुनधारा– ४ स्थित दहिझोडा वनबाट आज दिउँसो ३.३० बजे दहिझोडा सामुदायिक वनको खुड्किलो भन्ने स्थानमा लुकाई छिपाई राखेको अन्दाजी मूल्य १२ लाख २५ हजार बराबरको अन्दाजी ३५० क्यु. फिट साल जातको गोलिया काठ बरामद भएको सशस्त्र प्रहरी बल नेपाल नं. २ गण हेक्वा झापाले जनाएकाे छ ।
सशस्त्र प्रहरी बल, नेपाल नं. २ गण हेडक्वाटर झापा मातहत सुरक्षा बेश खुदुनाबारीबाट सशस्त्र प्रहरी नायब निरीक्षक भानुभक्त बि.क.को कमाण्डमा ५ जना, कन्काई सब डिभिजन कार्यालय सुरुङ्गा र दहिझोडा सामुदायिक वन उपभोक्ता समितिको संयुक्त टोलीले काठ बरामद गरेकाे प्रवक्ता एवं डिएसपी सुमन पोखेलले जानकारी दिए।
बरामद काठ आवश्यक कार्बाहीको लागि दहिझोडा सामुदायिक वन उपभोक्ता समितिको कार्यालयमा बुझाएको डिएसपी पोखेलले जानकारी दिए।
